Santos Ramos: “Candia volve a exercer de Delegada de Feijóo, asumindo competencias da Xunta con fondos provinciais”

Lugo, 10 de xullo de 2015.- O Deputado provincial socialista, Álvaro Santos Ramos, denunciou este venres que “Elena Candia volve a exercer unha vez máis de Delegada de Feijóo, -nunha clara manobra de competir con Raquel Arias-, anunciando que vai a suplir á Xunta en Lugo ao asumir con fondos provinciais o 100% do Servizo de Teleasistencia Domiciliaria, cando esta prestación a debe financiar a Xunta de Galicia, tal e como establece a Reforma da Administración Local, aprobada polo Goberno de Rajoy”.

Anteriormente, o Servizo de Teleasistencia Domiciliaria estaba financiado nun 65% polo Goberno Central e nun 35% polas Deputacións. Foi así ata 2013, cando Rajoy suprimiu a achega estatal para esta prestación, ao tempo que aprobou a Reforma da Administración Local, transferindo as competencias de servizos sociais ás Comunidades Autónomas.

En Galicia, Feijóo negouse a asumilas, transferíndoas ás entidades locais sen o financiamento correspondente para poder desenvolvelas. Foi así a lo menos en Lugo, onde Feijóo rexeitou un convenio de colaboración coa Deputación, -a pesares da decena de reclamacións de Gómez Besteiro para facelo-, que si asinou cos restantes organismos provinciais. De feito, o Goberno galego achegou máis de 25 millóns de euros para os servizos sociais de coruñeses, ourensáns e pontevedreses, mentres, “claramente, discriminou aos lucenses”.

Ante esta situación, o Goberno de Gómez Besteiro na Deputación de Lugo incrementou os seus fondos para o Servizo de Teleasistencia Domiciliaria, pasando de financiar o 35% ao 50%. É máis, os continuos recortes dos Gobernos do PP supuxeron que o Executivo de Besteiro aumentase nun 90% os fondos para servizos sociais na provincia de Lugo.

Santos Ramos subliñou que “Candia debería esixir á Xunta a sinatura deste convenio, exercendo de Presidenta da Deputación de Lugo e defendendo os intereses dos lucenses, e non facer de Delegada da Xunta en Lugo, escudando a Feijóo e os recortes dos Gobernos do Partido Popular, asumindo competencias impropias e investindo máis fondos provinciais, -por certo, grazas á boa situación económica e a débeda cero que deixamos na Deputación de Lugo-, nun servizo que é fundamental, pero que ten a obriga de cofinanciar a Xunta de Galicia en Lugo ao igual que fai nas restantes provincias de Galicia. É de xustiza facelo”.

De feito, lembrou, que o TSXG, nunha sentenza sobre o Decretazo de Servizos Sociais da Xunta, dictou que o Executivo autonómico ten a obriga de transferir financiamento ás entidades locais no caso de pasarlles competencias. En Lugo, non o fixo.