Veciños de Cervo promoven recollida de sinaturas para reclamar un espazo para parque canino e unha praia que permita o acceso a cans

Cervo, 2 de agosto de 2015.- Un grupo de veciñas e veciños do concello de Cervo promoven unha recollida de sinaturas con fin de reclamar do concello de Cervo que se habilite unha praia do municipio coas características necesarias que permita o seu uso polos seus cans, ademais piden que o concello dispoña dun espazo con papeleiras para o depósito de residuos orgánicos e zonas amplas e ben delimitadas onde poidamos gozar xunto coas mascotas e estas poidan correr, xogar, socializarse… sen molestar a quen non lle gusten os animais.

Xustifican a necesidade destas instalacións “porque cada vez son mais as persoas que teñen mascotas, fundamentalmente caninas, e teñen dereito a poder facer uso da natureza sen prohibicións que especialmente en tempada de verán, impide o uso das praias do municipio polos cans”

Diego Fernández, un dos promotores da iniciativa, expón que “a proposta ten como principais beneficiarios á veciñanza do concello e da comarca porque non existen instalacións destas características na Mariña, mais tamén servirá como atractivo turístico a moita xente que viaxa coas súas mascotas e buscan lugares con servizos para elas”.

Desde fai unha semana quen promove a iniciativa cunha recollida en papel que xa ten mais de 300 apoios e preto de 300 na plataforma change.org varias persoas e establecementos de Cervo, Burela e Foz dispoñen de folios para a recollida das sinaturas. Diego Fernández informa que de momento non teñen definido un período de tempo nin obxectivos para rematar o traballo de recollida de apoios mais vendo a boa acollida cren que non será moi longo polo que piden á xente interesada que se sume canto antes á proposta. Agradece a colaboración de todos os establecementos colaboradores e persoas que se sumaron á iniciativa.

Este domingo 2 de agosto ás oito da tarde na Praza dos Campos de San Cibrao está prevista a presentación pública da iniciativa á que acudirán persoas coas súas mascotas, polo que fai un chamamento a asistir a todas aquelas persoas que queiran sumarse que acudan á cita.

Para mais información chamar a Diego Fernández no número 658679594.

Establecementos onde se pode asinar
En Cervo A Pousada do Almacén,
En San Cibrao a Farmacia Vizoso, Librería Minerva, Bar O Pulgas, O Pedregal, Cafetería do CIT, Bar Camarote, Bar Telvi, Lusco Fusco, Pub Panadeiras .
En Burela en Fauna e Clínica A Marosa.
En Foz en pastelería Anduriña, Clínica Veterinaria Foz, Tintorería O Batán e ximnasio de Foz.