Elas gañaron en Madrid

Unha vez mais o éxito chegou en feminino. Algún día a historia do deporte terá que escribirse en feminino, algo ao que aquí na Mariña xa nos teñen felizmente acostumados as mulleres do Burela FS-Pescados Rubén, felizmente para a afección pero con inmenso traballo e sacrificio por parte delas, porque con traballo e sacrificio conseguiron o que ningún equipo na provincia fora capaz de acadar: gañar Liga, Copa e Supercopa na máxima categoría estatal. E tamén nos enchen de ledicia cando as escoitamos falar, con humildade, pero moi seguras de si mesmas, sabendo do que falan, desde logo que no polo oposto á verborrea estéril e friki dos deportistas chamados de elite só porque asinan contratos millonarios coas multinacionais do deporte.

E todo isto conseguírono desde Burela e desde A Mariña, desde unha vila e unha comarca pequenas onde se aprende a conxugar o verbo traballar nada mais nacer, ratificando aquel dito de que os grandes logros sempre nacen en sitios pequenos.

Partiron da Mariña para Madrid polas mesmas estradas de trinta anos atrás e por unha autovía que funciona a tempo parcial, polo mesmo camiño que a duras penas percorren todos os días o noso peixe, o noso leite, a nosa madeira… na mesma semana en que os tractores ocupaban vilas e cidades para non ter que tirar o leite. E chegaron a Madrid e foron decisivas, falando alto e claro como elas saben facer na cancha: metendo catro goles coma catro soles. E voltaron ledas para seguir na súa loita diaria cos seus estudos, os seus traballos, os seus adestramentos… para seguir medrando, e medrando nós tamén con elas.

Nesta sociedade que según din os entendidos precisa referentes, non miremos para fóra, témolas aquí, neste proxecto social e deportivo avalado, como non podía ser doutro xeito, por empresas tamén da Mariña.

Por todo isto, gustounos tanto que gañaran en Madrid…!!