O alcalde de Barreiros destaca a importancia da financiación por parte da Xunta de obras como as realizadas no entorno do colexio de San Miguel e da gardería de San Cosme

Barreiros, 24 de setembro de 2015.- O alcalde de Barreiros, Alfonso Fuente, destacou o papel da Xunta de Galicia, a través da Consellería de Presidencia, no financiamento das obras de mellora no entorno do colexio de San Miguel e da gardería de San Cosme. O rexedor agradeceulle ao departamento autonómico a súa axuda económica nestes proxectos durante a visita que este xoves realizou ao municipio Raquel Arias, a delegada territorial da Xunta en Lugo.

O rexedor dixo que “levamos xa uns anos recibindo estas axudas da Consellería de Presidencia e neste caso agradecemos que veña a delegada territorial a interesarse por estas obras. Unhas obras dunha mellora no entorno do colexio da San Miguel que vai favorecer unha mellor circulación alí, sobre todo máis protección e seguridade dos nenos cando saen do colexio, e tamén unha mellora en vieiros no centro de San Cosme, cuns novos aglomerados, nunha zona ao lado mesmo da gardería, onde hai moitísimo trafico polas mañás cando os pais veñen traer aos nenos, e por outro lado noutra zona que estaba en mal estado”.

Fuente Parga engadiu que “son pequenos investimentos, máis de 40.000 euros, dos que 33.000 os aporta a Xunta e o resto o Concello. É a liña na que hai que seguir, estas pequenas melloras todos os anos nos que xa sabemos a parte que temos que poñer e a parte na que nos van axudar. Creo que se van mellorando pouco a pouco os pobos, os accesos e neste caso tamén a seguridade dos nenos cando van ao colexio”.