A executiva do BNG califica os resultados da candidatura Nós na Mariña como “malos” e afirma que traballarán por “seguir defendendo a comarca desde e onde corresponda”

A Mariña, 23 de decembro de 2015. A executiva comarcal do BNG reuniuse na noite deste martes para facer unha primeira análise dos datos de resultados obtidos nas eleccións xerais do pasado domingo.

Cuns números que amosan unha caída de apoios importante, pasando de ser terceira a quinta forza, o organismo comarcal do BNG cualificou os resultados como “malos, sen medias tintas”.

“Perdemos apoios e representatividade, polo que non podemos amosarnos máis que descontentos con estes resultados, que nos levan a unha situación que teremos que analizar para ser quen de reverter e volver a ser referencia tamén nas eleccións xerais”, afirmou a responsable comarcal, Ana Ermida.

“Está claro que as veciñas e veciños apostaron por un cambio a nivel estatal e desde a candidatura na que o BNG se integraba non fomos quen de facernos ver como parte necesaria para ese cambio”, aseguran. “A xente ten claro que para defender esta comarca, este País e os seus sectores, non hai quen o faga mellor que o BNG e as forzas que integre; pero preferiron priorizar un cambio xeral e nós non logramos facer ver a nosa utilidade nese contexto”.

“É unha mágoa que o nacionalismo galego cunha candidatura feita por e para Galiza como foi a coalición Nós – Candidatura Galega, quede fóra neste momento, porque de feito, se no Estado hai algunha posibilidade real de cambio e políticas opostas ao Partido Popular pasan, de novo, polos nacionalismos vasco e catalán e, mentres, Galiza volverá quedar fóra dos debates que se darán”, lamentan desde o BNG.

Desde a executiva comarcal do BNG anuncian que os resultados valerán para iniciar un proceso xeral de reflexión que terá que concluír coas modificacións que democraticamente decida a militancia.

Traballo na defensa da comarca e os seus sectores desde e onde corresponda
Con todo, desde o BNG móstranse en disposición de seguir na defensa de solucións para os grandes problemas da comarca como son o desemprego, as infraestruturas ou a sanidade e na defensa dos seus sectores produtivos, desde a pesca ao agro ou a industria “coma sempre fixemos e alí desde onde nos corresponda”.

“As veciñas e veciños seguen tendo referentes nos seus concellos, saben que as 40 persoas que representan ao BNG desde as últimas eleccións municipais seguen traballando e tamén os representantes noutras institucións coma Deputacións ou Parlamento Galego ou Europeo seguen cada día levando os problemas da nosa xente e tentando dar respostas aos mesmos”, afirma Ana Ermida.

“Sabemos que o proxecto nacionalista é necesario para este País e a súa xente e seguiremos traballando para recuperar os apoios perdidos e lograr situar a comarca da Mariña no centro dos debates”, conclúen.