Os populares votan en contra dos orzamentos municipais “negativos para O Valadouro”

O Valadouro, 16 de marzo de 2016.- O presidente e voceiro municipal do Grupo Popular, Jose Manuel Lamela, explicou que a súa formación política votou en contra dos orzamentos municipais ao entender que son “negativos para O Valadouro”.

As contas deseñadas polo bipartito presentan “relevantes carencias e incongruencias” ademais de poñer en evidencia que socialistas e nacionalistas “non teñen un proxecto claro para este concello, afondando na parálise que caracteriza ao equipo de goberno”.

O SANEAMENTO DO RURAL ESQUECIDO
Os populares censuran, entre outras, a falta de investimentos no saneamento das zonas rurais, que antes constituía o destino preferente dos recursos económicos que o Concello recibe da Xunta polo Fondo de Compensación Ambiental.

“Feitas as obras na parroquia de Moucide, que é onde reside o alcalde, xa non hai previstas novas inversións, como si o resto do municipio non precisase tamén da rede de saneamento”-dixo Lamela.

O portavoz popular explicou que os orzamentos prevén destinar os 135.000 euros do fondo da Xunta para a construción dunha nave de agricultura ecolóxica, un obxectivo mal planificado “porque busca substituír dous invernadoiros adquiridos recentemente e que supuxeron un gran esforzo económico, sen ser capaces de explicar o uso que se lles vai a dar unha vez que se constrúa a nova nave”.

PROTECTORA DE ANIMAIS E DEPORTE BASE
Os populares tampouco entenden como é posible que os orzamentos deseñados polo bipartito tan só inclúan unha partida de 1.000 euros en apoio da futura protectora de animais. Trátase dunha achega “claramente insuficiente” se a comparamos con outras, como a de 2.000 euros e a cesión de instalacións, prevista para a asociación de tiro con arco.

Lamela tamén considera que a Alcaldía e o grupo de goberno mantén descoidado o seu apoio ao deporte base, ausente nas contas que deseñaron desde o bipartito. “Hai 9.000 euros para o equipo de fútbol, que hoxe non ten ningún xogador do concello e que non dispón das seccións de infantil e xuvenil. Precisamente a subvención debería dirixirse para ir creando canteira e que os rapaces do municipio foran incorporándose a esta actividade” Desde o PP apuntan a necesidade dun maior apoio municipal ás iniciativas deportivas da que poidan disfrutar directamente os veciños, mozos e maiores.

POLÍGONO INDUSTRIAL
Finalmente os populares cuestionan o “espellismo” de incorporar nas contas municipais unha partida de 85.000 euros para o polígono industrial cando a propia sociedade urbanística da Deputación de Lugo -SUPLUSA- non inclúe nos seus presupostos de 2016 ningunha partida para executar esta infraestrutura en O Valadouro, pese as promesas reiteradas que fixo o Alcalde neste sentido.