O focego Alberte Pena abre as Xornadas de Arte da Mariña

Foz, 15 de abril de 2016.- O luns 18 de Abril ás 20.30 no CENIMA de Foz, a asociación cultural A Pomba do Arco arranca a segunda edición da súas Xornadas “Sentirmos a Arte”, no marco do Mes das Artes Plásticas da Mariña, que comezará coa intervención de Alberte Pena Rei.

Alberte Pena Rei, Nace en Foz no ano 1970, Estuda Belas Artes na Universidade de Sevilla, na especialidade de Pintura e actualmente traballa como profesor de Bacharelato de Artes na comarca do Morrazo. Formado na Terapia Gestalt, especializado en Arteterapia nos últimos anos é facilitador de obradoiros de creatividade. O traballo artístico que desenvolve é un híbrido entre a pintura, a fotografía e a instalación. Segundo o artista “emprega a creación como o contedor fundamental dos meus procesos de transformación, considerando a súa obra como resultado da relación coa escuridade, coas transicións difíciles e tamén co vibrar do fluxo da vida.

Alberte Pena dará a coñecer a súa obra, abrindo paso a un debate sobre a mesma no que os asistentes poderán formular ao poñente as preguntas que considere oportunas e debaterase entre os presentes sobre a técnica, a disciplina e as funcionalidades do seu traballo. A este respecto hai que lembrar que a súa obra está neste momento exposto na Sala de Exposicións do Cenima, xunto a doutros artistas plásticos da Mariña, sendo esta un das moitas mostras nas que ten participado o focego. Nos últimos anos expuxo a súa obra na Casa da Cultura de Cangas do Morrazo, no Pazo de Tor en Monforte, no Museo Provincial de Lugo ou nunha sala da “Afundación” de Vigo.