O equipo de goberno pretende regular o mercado semanal dos venres en Burela

Burela, 26 de setembro de 2016. O equipo de goberno quere regular o mercado semanal dos venres e estuda cambialo de localización, segundo explicou esta mañá o alcalde, Alfredo Llano.

O rexedor dixo: “temos moito interese desde o Concello de organizar un bo mercadiño, un bo mercado dos venres aquí en Burela. Estámoslle dando voltas porque hai que regular perfectamente todo, hai que ter en conta onde están os sitios, qué lugares se poden adxudicar e qué método imos seguir para facer esa adxudicación, de tal maneira que todo o mundo saiba onde situarse e como”.

Alfredo Llano explicou que “temos que procurar cumprir coa lexislación en cuestións de seguridade e polo tanto imos facer un regulamento que normalice esta situación dos mercados aquí no noso concello. Posiblemente tamén fagamos unha proposta de nova localización para que sexa moito mellor. Buscaremos un lugar onde haxa menos tránsito de coches, onde non se ocasionen molestias nin problemas en caso de producirse unha urxencia por un incendio, unha necesidade hospitalaria ou unha saída con vado permanente. Evidentemente todo iso temos que garantilo e hai que procurar sempre que todo o mundo teña os seus dereitos”.

O alcalde burelés manifestou que “imos facer unha nova normativa para aplicala no noso concello, pero ao mesmo tempo tamén imos pensar nunha nova localización que estará moito mellor. Será no centro do noso pobo, vai ser útil para todos os habitantes de Burela que queiran ir ao mercado, espero eu sen prexudicar a ninguén, senón que se vai beneficiar a todo o mundo. Estamos buscando esa nova localización, que xa diremos onde vai ir unha vez que xa teñamos resolto ese problema”.

E engadiu: “queremos que se saiba que imos facer un novo regulamento do mercado aquí en Burela que se adapte perfectamente á normativa que se debe aplicar, e que garde todas as medidas de seguridade e as fórmulas para que se poida facer un bo mercado sen interromper ningunha necesidade urxente”.

O lugar ao que se trasladará o mercado semanal, que se celebra os venres en Burela “terá unha localización ampla, que será moi mellorada. A nosa intención é ampliar moito o mercado de Burela porque é un dos máis grandes da Mariña, pero ao mesmo tempo eu penso que está moi consolidado aquí no noso concello e polo tanto hai que darlle oportunidade a todo o mundo de que poida vir aquí sempre cos seus papeis e co seu regulamento ao día porque iso será unha vantaxe clara para todo o mundo”.