A Mancomunidade A Mariña selecciona a 60 persoas que participarán no programa de formación ‘Avanza’

A Mariña, 17 de outubro de 2016. A Mancomunidade de Municipios de A Mariña realizou este luns as probas de selección das 60 persoas que participarán no programa de formación Avanza. O fin último deste plan é a inserción laboral de 21 persoas, segundo lembraba Alfredo Llano.

O presidente da Mancomunidade declarou que “estivemos toda a mañá a través dos funcionarios e persoal dos diferentes concellos que conforman este programa Avanza, facendo as probas de seleccións das 60 persoas que participarán e despois teremos que para insertar laboralmente a 21. Hai que lembrar que somos os concellos de Barreiros, Mondoñedo, Pontenova, Riotorto, Burela e O Vicedo os que estamos neste plan”.

Alfredo Llano lembrou que “fixemos esta preselección dos candidatos a participar neste programa Avanza que non ten outro obxectivo máis que procurar a mellora para atopar traballo, e buscar unha formación que sexa dirixida practicamente a facilitar o emprego o antes posible”.

O presidente da Mancomunidade engadiu que “está dirixido a persoas desempregadas con discapacidade para as que había 4 prazas, para persoas desempregadas en risco de exclusión social incluídas perceptoras do RISGA son 5 prazas, mulleres desempregadas que acrediten a condición de vítimas de violencia de xénero son 3 prazas, menores de 30 anos desempregados de baixa cualificación son 22, menores de 30 anos desempregados 14 e mulleres desempregadas 12. Desas 60 persoas temos que insertar laboralmente a 21 e temos que mirar cómo imos facer. En principio tíñamos unha preocupación a de non ter suficiente xente, pero mandamos a través do INEM de Ribadeo que coordinou esta labor de enviar cartas aos posibles candidatos, mandounos 120 e deles seleccionamos a 67 dos que quedará unha lista definitiva con 60 e os 7 restantes en reserva por si alguén fallase”.

Alfredo Llano anunciou que “agora o que imos facer é mirar onde establecer a formación, como son seis concellos procuraremos ter tres sitios onde impartila. Imos ter unha xuntanza o xoves cos alcaldes, pero en principio por exemplo Barreiros e Mondoñedo serían un núcleo de formación, sería tamén A Pontenova e Riotorto, e Burela e O Vicedo”.

Desde a Mancomunidade o seu presidente subliñou que “a formación irá orientada á inserción laboral e queremos que polo menos traten tres temas que serán restauración e hostalería, asistencia sociosanitaria e atención a maiores, e tamén outra formación máis polivalente de cara á industria depende das preferencias que marcara cada unhas das persoas que se entrevistaron esta mañá, procurar darlle unha preferencia a aquelas labores que máis se demanden ou para as que máis se sinta preparada a xente, pode ser para a industria, a pesca, ou o rural”.

Alfredo Llano concluíu: “polo menos xa temos á xente seleccionada e agora calculo eu que a partir do 1 de novembro poidamos xa comezar coa formación”.