O Observatorio da Mariña pola Igualdade reproba a linguaxe sexista utilizada polas administracións locais da comarca

A Mariña 4-4-17. As diferentes Administracións da Mariña lucense contan con plans de igualdade, declaracións polo 8 de marzo e outras efemérides, con minutos de silencio e parafernalia varia. Porén, isto fica no plano simbólico sen facer un traballo real ou confiar realmente na mudanza a través da linguaxe inclusiva como un paso máis cara a igualdade de xénero.

Logo de ver o que acontece no hospital comarcal, podemos comprobar que os sitios web dos concellos mariñáns utilizan unha linguaxe sexista. Chama a atención que, dentro do proceso de dixitalización á que as administracións locais están obrigadas segundo a Lei 39/2015, non aproveitasen a oportundide para corrixir isto.

Un exemplo son os propios formularios onde se refiren á persoa que solicite a mudanza de domicilio fiscal como «datos del solicitante» e asinado «O solicitante». Por outra banda, no que se refire ás ofertas de emprego, podemos observar que se refiren á «lista provisional de admitidos». Na mesma liña, convócase unha praza de auxiliar da administración baixo o masculino xenérico «auxiliar administrativo». Se ben nalgúns concellos semella existir unha maior sensibilidade, xa que hai casos de convocatorias coa fórmula neutra de «persoal», seguen a existir algúns fallos como «requisitos dos aspirantes». No que atinxe ás actas dos plenos, é evidente como estas se refiren ás persoas integrantes da corporación que asisten ao Pleno como «Concelleiros» ou «coa asistencia dos Concelleiros», cando existen concelleiras en todos os concellos da comarca.

Todos estes casos, recollidos en ofertas de emprego, actas e formularios públicos, evidencian unha práctica común —en distintos graos— a todos os concellos da Mariña e que ademáis supón unha eiva no camiño cara a igualdade de xénero.