Este luns foi presentada en Rinlo a festa do percebe, que terá lugar o vindeiro sábado. O Alcalde, Fernando Suárez, anima a asistir a un evento gastronómico, que está totalmente consolidado

Ribadeo, 7 de agosto de 2017. O vindeiro sábado, 12 de agosto, vaise celebrar a décimo cuarta edición da Festa do Percebe de Rinlo. O evento foi presentado este mediodía nese peirao.
O alcalde de Ribadeo, Fernando Suárez, comentou que “este vindeiro sábado, día 12 de agosto, volve a Ribadeo, particularmente volve a Rinlo, esta parroquia pequena, pero tan marabillosa que temos aquí en Ribadeo, a Festa do Percebe de Rinlo. Este evento que creamos hai uns anos, pero que está absolutamente consolidado e que é unha referencia de moitísima xente tanto de Rinlo, de Ribadeo e de moitos quilómetros á redonda, que non queren perder este evento de exaltación do percebe, e sobre todo de exaltación de Rinlo, esta parroquia pequeniña, pero dinámica ao mesmo tempo”.
O rexedor salientou que “a agrupación de percebeiras, que pertence á confraría de pescadores de Ribadeo, están afanadas traballando e apañando o percebe nestes últimos días nos que as mareas non son demasiado grandes, e nos que o mar que arrecia fortemente, pero están facendo todo o posible para ter todo canto percebe poidan vender e ofrecer ao público durante toda a xornada deste sábado 12. Será ao prezo do ano anterior, 13 euros a ración”.
Fernando Suárez quixo “convidar tanto desde a agrupación de percebeiras como desde o Concello de Ribadeo, desde a área de Turismo especialmente, a todas aquelas persoas que se pasen pola Mariña que non deixen de vir a Rinlo a degustar os percebes, que non deixen de participar nun dos eventos máis bonitos e fermosos de toda a tempada estival na Mariña de Lugo”.