Lugo, 12 de setembro de 2017. O Presidente da Deputación, Darío Campos Conde, acompañado doutras autoridades da provincia, así como de representantes das restantes 3 Deputacións Provinciais, fixo entrega este martes do Premio Otero Pedrayo 2015, organizado polo Goberno da Deputación e que recaeu no escritor lucense Arcadio López Casanova. No acto, o premiado estivo representado por Luís González Tosar.
Logo da entrega dos distintivos, o Presidente da Deputación fixo a seguinte intervención:
Neste ano 2017 címprense 30 anos da creación dos premios Otero Pedrayo, un certame nacido ao abeiro das 4 Deputacións Galegas. Dende a súa creación en 1977, a Deputación que presido vén participando en todas as edicións do premio, ben sexa como entidade organizadora ou contribuíndo coa achega económica correspondente.
Para este Goberno Provincial é unha honra e orgullo participar neste premio, co que amosamos o noso compromiso co presente e co futuro.
E digo isto porque:
Con este premio, poñemos en valor a figura do escritor ourensán Ramón Otero Pedrayo, patriarca das letras galegas e considerado un referente imprescindible para a cultura galega.
Ademais, na organización deste certame, participan as institucións culturais e educativas máis prestixiosas da nosa comunidade autónoma: as tres universidades de Galicia, a Real Academia Galega da Lingua e o Instituto Padre Sarmiento de Estudos Galegos.
E sen dúbida, o feito máis importante é que, con este recoñecemento preservamos a memoria dunha persoa de enorme influencia no campo das letras; premiando unha labor a prol da cultura galega.
Dito isto, lembrar que no ano 2015 esta Deputación foi a encargade de organizar o Premio Otero Pedrayo, que recaeu no escritor, académico e catedrático lucense, Arcadio López Casanova.
Arcadio López Casanova, nacido en Lugo e criado nas terras do Páramo inicia a súa carreira literaria nesta cidade de Lugo onde, sendo un adolescente comeza a colaborar no xornal El Progreso e publica o libro de relatos Tío Mingos. Cuentos de Galicia e crea, con algúns compañeiros de instituto, a revista Escritos.
Xa en Compostela, estudou Filosofía e Letras onde entrou en contacto cos mestres do galeguismo, entre outros co propio Otero Pedrayo, e cos escritores da súa xeración. López Casanova colabora en cabeceiras tan prestixiosas como La Noche e La Voz de Galicia e edita o seu primeiro libro de poesía Hombre último, censurado polo franquismo.
De regreso a Lugo segue a desenvolver unha importante actividade cultural. Xa no ano 1968 trasládase a Valencia, lugar no que obtén unha cátedra de Lingua e Literatura Españolas.
Nestes anos, produciu máis de vinte libros de poesía, en galego e castelán. Un deles, Mesteres, supuxo un auténtico fito na renovación da poesía galega dos anos 70.
Dito isto, e vista a importancia nas nosas letras de López Casanova, so me resta facer patente o noso recoñecemento e transmitirlle os nosos máis sinceros parabéns ao escritor lucense, representado hoxe aquí por Luís González Tosar.
Cremos honestamente que a decisión do xurado fai xustiza con Arcadio Lopéz Casanova, ao recoñecerlle os méritos dunha carreira literaria que o fan merecedor deste galardón.
Moitas grazas.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
