A Mariña 22-9-17. Se gostas de cantar en grupo sen nengun estilo en concreto pode ser este quizás o teu lugar. Precisanse persoas con certo ouvido musical a nivel armónico e acostumadas a cantar sexa de maneira profesional ou amateur, precisanse persoas que entendan o grande acto de xenerosidade e respeto que é cantar en comunidade con outros-as. Precisanse persoas de calquer idade e condición.
Os ensaios do coro levanse a cabo na Escola Vella de Rinlo os venres as sete da tarde até as nove. O repertorio é de inspiración mariñeira, é dizer, todas aquelas cancións ben sexan de pop, rock, tradicional, jazz…que sexan do gosto das persoas do coro e que teñan o mar como telón de fondo.
Os arranxos vocais son realizados por Pierrot Rougier, músico bretón afincado no Occidente de Asturias e o coro é co-dirixido pola cantora e compositora Ugia Pedreira nada en Foz.
O coro promove cursos de formación con expertos profesionais do canto coral, xa pasaron por Rinlo a directora de teatro-voz Cristina Dominguez (ex-directora do Centro Dramático Galego), o recoñecido director coral Ramón Bermejo (Coro da Rá, Compostela), a bailarina Irene Alvarez e a poeta Marina Oural, Chefa Alonso (Madrid) dando curso de improvisación e tenen pensado seguir coa liña formativa que abren a toda a comunidade coral da Mariña e Occidente astur.
Entre o repertorio actual do coro está “Serpientes de Mar” de Silvio Rodriguez, “Alfonsina y el Mar”, “Chalanero” canción popular fronteiriza entre Asturias e Galiza, un cover de “Viento del Norte” en galego do cántabro Nando Agueros que informou ao coro do seu interese neste cover galego para si mesmo, a popular canción mariñeira “A dorniña” , “Sail on sailor “ de The Beach Boys….
O traballo de arranxos de nova creación, divulgación, ensino e aprendizaxe do coro mantense cunha matrícula individual de 30 euros ao mes que cubre ensaios de venres e mesmo algún pola semán.
No Coro da Mariña tense moi en consideración as necesidades e cualidades individuais de cada cantor-a, a heterogeneidade e diferencia é un valor en alza aproveitada para a conxunción colectiva e son final.
Mais información na pag. Facebook do coro, no tlfe 627 934368 ou no email ugia@folque.com.