O obradoiro de xardinería do Concello burelés remata o 28 de xuño. Este martes o Alcalde visitou xunto ao alumnado e profesorado algúns dos traballos realizados

Burela, 26 de xuño de 2018. O alcalde, Alfredo Llano, visitou ese martes xunto ao alumnado e profesorado do obradoiro de xardinería os traballos realizados na vila durante os últimos nove meses. Dito obradoiro rematará a súa andaina o 28 de xuño e Llano agradeceu a labor realizada.
O rexedor contou que “hoxe estivemos de ruta co obradoiro de xardinería vendo un pouco todas as labores que se fixeron. Foi un traballo extraordinario o que se fixo con este obradoiro durante estes nove meses e que van rematar o día 28, o xoves próximo”.
Alfredo Llano dixo que “quixemos agradecerlles a súa labor e comentamos con eles todos os traballos que se fixeron en diferentes sitios de Burela que deron unha imaxe nova ao noso pobo, e grazas a estes alumnos melloraron moito”.
O alcalde burelés explicou que “visitamos a nova escola infantil, á que lle deron un cambio radical, axardinaron todo o patio e os exteriores e déronlle unha imaxe nova, atractiva e moi motivadora para ser visitada, estase moi a gusto alí. Foi o que nos decidiu volver solicitar para o ano que ven este obradoiro de xardinería porque se fixo moito traballo, pero aínda queda moito que facer”.
Llano subliñou que “é unha actividade que lle vai moi ben a moitos alumnos aos que lles gusta este tema. Ímoslle dar continuidade e sempre se aproveita o Concello de toda esta labor que tan ben están a facer. Felicitamos ao encargado, ao profesor que deu o curso máis aos rapaces que colleron bo nivel de traballo para que no futuro lles poida servir para a que podería ser a súa profesión”.
O rexedor insistiu en que “estamos moi agradecidos, e cremos que fixemos ben en elixir este obradoiro porque realmente houbo un cambio estético e funcional en todo o noso concello”. Burela compartiu este obradoiro de xardinería cos Concellos de Cervo e Xove.