Ribadeo, 27 de setembro de 2018. A xunta directiva de Acisa ultima os detalles das campañas que se desenvolverán en Ribadeo ata finais de ano. Do 2 ao 4 de novembro terá lugar unha nova edición das xornadas gastronómicas Asturias en Ribadeo e do 22 ao 25 dese mes celebrarase o Black Friday.
Na reunión mantida esta semana pola xunta directiva de Acisa acordouse continuar cun traballo intenso para tentar que o peche do ano sexa positivo e fíxose balance da repercusión que o turismo tivo para o comercio e a hostalería ribadense: “aínda que o mes de xullo foi bastante frouxo con respecto a anos anteriores, agosto cumpriu coas expectativas que nos realizamos, sobre todo para os hoteis e restaurantes da nosa vila. Setembro tamén estivo ben, pero debemos traballar para mellorar o impacto turístico no comercio e nos bares. É certo que puidemos ver as rúas de Ribadeo ateigadas de xente durante as fins de semana dese mes e con moi bo ambiente os días laborables, pero temos que seguir loitando para que setembro sexa un mes importante para todos os nosos asociados e asociadas”. E subliñan que “agora toca traballar porque temos por diante un longo outono inverno, pero desde Acisa temos programadas xa varias actividades ata mediados de xaneiro”.
En outubro o día 13 terá lugar o sorteo da FCAM no parque de San Francisco, no que se porán en xogo 1.500 euros en vales de compra para gastar nos establecementos asociados a Acisa.
Do 2 ao 4 de novembro chegará unha nova edición das xornadas gastronómicas Asturias en Ribadeo “co fin de potenciar a hostalería e tamén ao comercio, nunha ponte que soe traer moitos visitantes a Ribadeo. Trátase tamén de render homenaxe á veciña Asturias, xa que centos de persoas se desprazan as fins de semana ata Ribadeo para facer as súas compras, para pasear e tomar os viños e xantar na nosa vila”. Durante esas datas haberá actuacións musicais para animar as xornadas gastronómicas en varios puntos de Ribadeo.
Tamén en novembro chegará o Black Friday: “este ano como novidade a duración desta campaña en Ribadeo será de catro días do 22 ao 25 de novembro. Haberá importantes descontos co obxectivo de potencias as compras no comercio local e próximo de Ribadeo, fronte ás grandes áreas ou plataformas de venda on line”.
Desde agora e ata finais de ano Acisa seguirá a promocionarse fora do municipio coas campañas Ribadeo, o centro comercial coas mellores vistas e Domingueo en Ribadeo. Desde a directiva da Asociación de Comerciantes, Industriais, Servizos e Autónomos indican que “con ambas campañas o que buscamos é atraer clientes e visitantes a Ribadeo sobre todo de outubro a Semana Santa, xa que despois desas datas o normal é que comece a chegar o turismo internacional a esta zona, os peregrinos, etc…”.
Por último, a campaña de Nadal de Acisa Ribadeo desenvolverase do 1 de decembro ao 12 de xaneiro, data na que se celebrará a tradicional Festa do Comercio: “en Acisa optamos por realizar unha campaña especial, de renome, que chame a atención pola contía dos premios que poñeremos en xogo. Queremos manter como única campaña propia durante as vindeiras navidades a Festa do Comercio, na que imos sortear un total de 5.000 euros en premios, a maioría no sorteo presencial, pero tamén haberá un premio de 1.000 euros, que será non presencial, para incentivar aos clientes doutras vilas e cidades a facer as súas compras en Ribadeo durante esas datas, de xeito que se fidelicen con nós. Ademais senón están en Ribadeo o 12 de xaneiro terán a posibilidade de facerse cun importante premio”.
Alerta
Por outra banda desde Acisa advirten da presenza dunha muller alta, delgada e pelo longo negro, de nacionalidade rumana, que hai uns días entrou nun establecemento asociado “pedindo que se firmasen algo e nun momento de despiste achegouse á caixa rexistradora e levou a recadación que alí había nese momento. A Garda Civil e a Policía Local están tentando dar con esta persoa. Desde Acisa o que lles recomendamos aos nosos asociados é que teñan precaución e que estean atentos por si alguén deste perfil entra no seu local. Chegado o caso pregámoslles que se poñan en contacto coas forzas de seguridade”.
Intensa axenda de actividades de Acisa Ribadeo para os últimos meses do ano. En novembro terá lugar unha nova edición das xornadas gastronómicas Asturias en Ribadeo e chegará tamén o Black Friday
Relacionado
-
Lourenzá celebra unha nova tarde de lecer con Xogando á petanca dentro de Verán na Praza
-
Cariño deseña un dispositivo especial de mobilidade e seguridade para vivir o eclipse e habilita un servizo especial de autobuses.
-
Acisa Ribadeo anuncia a renovación da súa xunta directiva con lista única e paritaria
Baixo o título Memoria de mariñáns. Unha crónica da emigración da Mariña, o xornalista e investigador Martín Fernández Vizoso ofrecerá unha intervención centrada nas historias e vivencias dos emigrantes da comarca, ilustrando o fenómeno migratorio que marcou a vida de moitas familias ao longo do século XX. O evento inclúe tamén unha imaxe histórica de mariñáns retornados de América nos anos 30, que serve de fío visual para contextualizar esta realidade.
O prólogo é da profesora de Debuxo Camino Casabella Pumares, artista con raíces no Alfoz do Castrodouro, que participará na presentación xunto ao presidente do colectivo. Cinco dos pintores estarán presentes no acto, xa que Alaxe faleceu hai tres anos. A portada do caderno é obra do ilustrador Xosé Blanco. O evento celebrarase o sábado 8 de agosto ás 20:00 horas no castelo do Castrodouro, en Alfoz do Castrodouro.
En total foron ofertadas preto de 80 prazas de surf, piragüismo e vela, destinadas a nenas e nenos con idades comprendidas entre os 9 e os 15 anos. As escolas desenvolvéronse en diferentes quendas nos meses de xuño e xullo. O concelleiro de Deportes, Francisco José Silvent, subliñou “a importante participación da rapazada ribadense nas escolas deportivas de verán, que organizamos desde o Concello de Ribadeo coa axuda dos clubs que as impartiron. Queremos agradecer ás familias a confianza depositada nas nosas actividades, que lles serviron aos asistentes para practicar deporte na auga e para pasar uns días aprendendo e perfeccionando técnicas”.
No encontro mantido na sede da delegación territorial da Xunta en Lugo, no que tamén estivo o director territorial da Consellería, Marco Antonio Fernández Piñeiro. abordáronse liñas de cooperación para a mellora de Infraestruturas e de seguridade viaria, de interese para este municipio. O departamento que dirixe M. Allegue segue prestando apoio aos municipios para executar actuacións que contribúan a mellorar a calidade de vida da veciñanza e a reforzar a competitividade económica.
Xa se poden ver auténticas "artistadas", todas coas serea como protagonista, enchendo o ambiente desa creatividade tan propia da celebración.
O corte estará vixente entre as 00:00 e as 05:00 horas da madrugada do venres 7 ao sábado 8 de agosto, co obxectivo de garantir a seguridade das persoas asistentes e o correcto desenvolvemento do evento, que terá lugar nos Xardíns Noriega Varela. Desde o Concello de Viveiro solicítase a colaboración da veciñanza e das persoas condutoras, recomendando planificar os desprazamentos con antelación e utilizar itinerarios alternativos durante o tempo que permaneza vixente esta restrición.
No Campo de Fútbol de As Valgas poderanse ver desde as 21.30 horas as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que promete unha noite inesquecible.
