No Concello de Ribadeo arrinca unha nova edición dos obradoiros de emprego Doc-tic. Mantense a especialidade de producción fotográfica e introdúcese como novidade a de operacións auxiliares de servizos administrativos e xerais

Ribadeo, 27 de setembro de 2018. O Concello acolleu a presentación dunha nova edición dos obradoiros de emprego. Hoxe iniciouse a segunda edición do denominado DOC-TIC, que xa se celebrou o pasado ano.
Nesta ocasión mantense a especialidade de Produción Fotográfica, e introdúcese a de Operacións Auxiliares de Servizos Administrativos e Xerais.
Os custes das contratacións temporais, que se formalizan cos participantes, contan coa subvención da Consellería de Economía, Emprego e Industria, e son cofinanciados polo Fondo Social Europeo e a iniciativa de Emprego Xuvenil, nun 91´89%, con cargo ao Programa Operativo de Emprego Xuvenil 2014-2020.
O Concello de Ribadeo promove estes obradoiros de emprego “cos obxectivos de implementar actuacións para contrarrestar os problemas de emprego que afectan a distintos colectivos como empregados de longa duración ou mocidade, facilitándolles formación e práctica laboral coas que afrontar a busca de emprego. Neste obradoiro daranse a coñecer as prácticas administrativas, as funcións dun organismo e as posibilidades da imaxe e as novas tecnoloxías aplicadas á xestión documental. Outro dos fins deste obradoiro está en facilitar ao Concello e aos seus traballadores o cumprimento do servizo público que teñen encomendado, xa que as labores de organización, descrición e dixitalización de documentos permiten unha xestión máis áxil e segura. E finalmente está o aspecto cultural de aprecio ao patrimonio e salvagarda das testemuñas da actividade de persoas e institucións que explican a historia de Ribadeo e o seu desenvolvemento”.
Cos participantes neste novo obradoiro de emprego estiveron esta mañá responsables da Área de Desenvolvemento Local do Concello de Ribadeo e o alcalde, Fernando Suárez Barcia.