Balance do traballo e iniciativas do BNG de Viveiro durante o ano 2018

Viveiro 21-1-19. O BNG de Viveiro convocou unha rolda de prensa para dar conta aos medios de información e a nosa veciñanza do balance sobre o traballo que realizamos ao longo do ano 2018 co ánimo de dar resposta ás demandas e preocupacións das veciñas e veciños e co obxecto de aportar solucións para mellorar o noso concello, xa que aínda que nos vimos obrigad@s a traballar desde fóra da corporación municipal o Bng nunca deixou de estar comprometido coa veciñanza de Viveiro e nunca se quedou nin quixo quedarse á marxe da política municipal e dos problemas que padece o concello e que sufrimos a diario as súas veciñas e veciños.
Desde o BNG pensamos que, a pesares das dificultades coas que nos enfrontamos para realizar o noso traballo político desde fóra da institución municipal, fomos quen de poñer o foco nos principais problemas do concello e nas preocupacións e inquedanzas da veciñanza e fumos quen de facer unha “oposición construtiva desde a rúa” para dar resposta aos mesmos, porque cremos e apostamos por un modelo de vila viva e dinámica e con futuro para as novas xeracións, polas que estamos convencidas de que merece a pena loitar arreo e, é por isto fundamentalmente, polo que o Bng non entende a pasividade e o desinterese do goberno municipal de María Loureiro que ven amosando ante a práctica totalidade de iniciativas presentadas no concello polos nacionalistas, e nin que dicir ten a actitude negacionista da Xunta do PP ante as nosas reivindicacións e demandas, as cales consideramos que son propostas todas elas feitas en positivo e positivas para Viveiro porque se fan eco das demandas, preocupacións e queixas das nosas veciñas e veciños e son propostas que intentan aportar solucións, e non poñerlle paos na roda, ao goberno municipal. O Bng lamenta que o goberno do psoe perdera a oportunidade de darlle resposta ás demandas da veciñanza, e que so obtivera e obteña o seu silencio e menosprezo e nas últimas semanas incomprensiblemente descalificacións e saídas de tono da alcaldesa ante algunhas das iniciativas impulsadas pola nosa organización durante o 2018.

Pásolle agora a palabra á compañeira Miriam que vos vai falar de xeito resumido das iniciativas, propostas e accións levadas a cabo en materia de sanidade, medioambiente, igualdade, memoria histórica e política cultural, e pechará o compañeiro Seve falándovos sobre as accións desenvoltas polo Bng en materia de infraestruturas viarias, urbanismo e industria.

Miriam:

En primeiro lugar cabe recordar que moitas das iniciativas, demandas e actuacións realizadas polo Bng de Viveiro foron na defensa da Sanidade pública de proximidade e de calidade e na loita pola recuperación deste dereito básico e innegociable. Por outra banda o Bng, ante a situación de degradación medioambiental e problemática económica e social que sufren a Ría e da Praia de Covas desde hai décadas desenvolveu, e seguirá desenvolvendo, diferentes iniciativas co fin de reclamar o saneamento integral da nosa ría para recuperala como motor económico, social, ambiental e turístico de Viveiro e colaborou cos movementos veciñais na defensa pola rexeneración da Praia de Covas. Asimesmo, dentro das preocupacións medioambientais da nosa organización pola situación de olvido e abandono dos nosos montes e a riada que sufriu Viveiro no mes de novembro fixo que o Bng preguntara ao goberno da Xunta, a través do seu grupo parlamentar, sobre as causas da riada e a limpeza do río que asolagou Xunqueira e causou a morte dunha veciña.

O Bng de Viveiro consciente do aumento da violencia machista, consecuencia esta da desigualdade amparada polo sistema patriarcal, apoio e participou en numerosas mobilizacións convocadas polas plataformas feministas e presentou iniciativas ao goberno de María Loureiro para condenar con contundencia o machismo e a xustiza inxusta e na defensa pola igualdade real entre mulleres e homes. No ámbito da Lei pola recuperación da Memoria histórica o bng non quixo deixar pasar a oportunidade de apoiar a Galiza Nova e a comunidade educativa do CEIP de Celeiro para a retirada do nome do fascista A Pedrosa Latas deste centro de ensino público e solicitou o apoio do concello de Viveiro para os 19 de Meirás, activistas para os que pide a Fundación Francisco Franco e a familia Franco ata 247 anos de cadea por unha acción simbólica e pacífica para reclamar a devolución do Pazo de Meirás para o pobo, apoio que ata o día de hoxe non recibiron por parte deste concello.

A política cultural municipal debería ser un dos eixos centrais do programa de calquera goberno municipal e ademais debería facela extensiva a todo o termo municipal, para facer isto último posible o Bng propuxo a creación dunha rede de centros socioculturais municipais para optimizar o uso racional e eficiente e o equipamento e patrimonio cultural de titularidade municipal. Dentro deste mesmo ámbito cultural e patrimonial o Bng de Viveiro ademais de propoñer ao goberno municipal a recuperación e conservación de patrimonio emblemático do concello propúxolle, sen éxito, á alcaldesa que o concello declarase o 24 de febreiro, día no que naceu a figura máis importante do primeiro renacemento galego, Día de Rosalía de Castro, para poñer en valor a nosa lingua, a nosa identidade e a figura da nosa escritora máis universal, en definitiva para preservar o noso patrimonio cultural e a nosa propia historia. A proposta, por certo, caeu en saco roto.

Seve:

En materia de infraestruturas viarias e urbanismo desde o Bng defendemos o tren de proximidade e por iso nos mobilizamos, xunto coa veciñanza e compañeiros, alcaldes e alcaldesas do Bng das Comarcas de Ferrol, Ortegal e A Mariña, para denunciar o desmantelamento que ven sufrindo dende hai tempo o servizo de FEVE, un servizo esencial para a vertebración e desenvolvemento económico e social do noso país e demandarlle á Xunta e goberno estatal investimentos para a súa mellora.

Por outra banda, presentamos numerosas iniciativas para exixir melloras e acondicionamento de estradas de ámbito local, comarcal e autonómico, ao seu paso polas parroquias do termo municipal, e propuxemos a posta en marcha dun plan de supresión de puntos negros existentes ao largo e ancho do concello que poñen en perigo diariamente á veciñanza, así como numerosas medidas que contribuirían a rebaixar a siniestralidade na travesía de Covas, ao mesmo tempo que reclamamos medidas de seguridade nas edificacións en estado ruinoso do concello, e propuxemos ao goberno municipal, ademais, medidas a desenvolver no casco urbano para camiñar cara un modelo de vila habitábel, saúdabel, segura, integradora e limpa e apostamos polo noso comercio local e así o apoiamos.

E por último pero non por iso menos importante, senón todo o contrario, o Bng de Viveiro, dentro da campaña desenvolta a nivel nacional pola nosa organización contra o tarifazo da luz ás galega e galegos, levamos a cabo unha recollida de sinaturas no mes de decembro contra esta estafa eléctrica, para demandarlle á Xunta do PP a adopción de medidas prácticas para a diminución do prezo da mesma, como son unha tarifa eléctrica propia para Galiza, das que se beneficiarían as familias e empresas asentadas no territorio galego, como é o caso de Alcoa e como xa están a beneficiarse as empresas do País Vasco a través da súa tarifa diferenciada.