O PP de Ribadeo agradece o apoio de 1.740 votantes, o que supón unha suba do 45 por cento. Daniel Vega felicita a Suárez polos resultados, aínda que baixou en todas as mesas

 Ribadeo, 28 de maio de 2019. O Partido Popular de Ribadeo, por medio do seu candidato á Alcaldía, Daniel Vega, agradece o apoio de 1.740 votantes nas eleccións municipais deste pasado domingo, o que supón unha suba do 45 por cento. Ademais felicita a Fernando Suárez polos seus resultados, aínda que baixou en todas as mesas.
“En primeiro lugar quero darlles as grazas ás persoas que nos votaron e apoiaron este proxecto que significa traballar por e para Ribadeo; estamos tremendamente agradecidos por ese respaldo de 1.740 votos, que significa subir un 45 por cento e dez puntos. O Partido Popular atópase nunha oposición e nunha posición moi importante. Na oposición estaremos para fiscalizar ao goberno, pero tamén propoñendo e traendo investimentos para Ribadeo. Nós dicíamos na campaña electoral que había que acudir a unha colaboración institucional que signifique traballar e impulsar iniciativas a favor de Ribadeo. Polo tanto aquilo que dicíamos no lema Ribadeo é o que importa ten que pasar agora aos feitos, que acreditarán que o Partido Popular vai ter esa posición leal con Ribadeo, a favor de Ribadeo; iso é o que nos vai mover”, manifestou Daniel Vega.
Vega engadiu: “sen lugar a dúbidas tamén temos que felicitar ao señor Suárez por ese resultado electoral. É verdade que baixou un concelleiro, baixou votos en todas as mesas, pero el ten agora mesmo o labor de goberno e nós vamos estar en colaboración con Ribadeo”.