Lugo, 25 de xuño de 2019. O Presidente en funcións, Darío Campos Conde, e a Alcaldesa de Viveiro, María Loureiro García, presentaron este martes o XIV Resurrection Fest, o festival de música metal e rock máis importante de España e un dos máis relevantes de Europa, que se celebrará desde o 3 ao 6 de xullo. Fixérono acompañados de Iván Méndez Rodríguez, Director do festival.
Campos Conde adiantou que “dende a primeira edición o Goberno Provincial, xunto ao do Concello de Viveiro con Melchor e María, apostamos por este festival e convertemos á Deputación na institución que máis colabora con esta cita. Facémolo cunha achega de 150.000 euros, pois o Resu é capaz de xerar un volume de negocio na nosa provincia de máis de 6,6 millóns de euros e de 8,5 en toda Galicia”.
Pola súa parte, o Concello de Viveiro cede os terreos para a organización do festival e pon a disposición dos usuarios o cámping gratuíto en Covas (con servizos de baños, duchas e buses) e o Mirador de San Roque (que tamén conta cunha gran zona de aparcamento). Ademais, este ano, grazas ao acordo de colaboración entre o Concello e o festival, os viveirenses poden participar neste macro evento á metade de prezo, xa que contan co 50% de desconto nas entradas.
Loureiro García, ao igual que o Presidente, lembrou con moito cariño a Melchor Roel “que apostou e impulsou o Resu, facendo posible o que hoxe vemos. Sempre confiou neste festival, que tamén é seu. Hoxe estaría moi orgulloso de ver as dimensións ás que chegou ou a súa repercusión a nivel mundial, poñendo no mapa a Viveiro. Porque o Resu non se entende sen Viveiro e o Concello sen o festival, que forma xa parte da nosa historia”.
100.000 persoas, 40 países e 2.100 empregos
Campos Conde subliñou que “isto non é un gasto senón un investimento para a nosa provincia. O Resu ten todo un recoñecemento mundial. É o mellor festival de rock de España e dos mellores de Europa. Atrae a 100.000 persoas de máis de 40 países e xera uns 2.100 postos de traballo directos e indirecto pois, por exemplo, contrátase persoal de seguridade, produción, iluminación, son, limpeza, atención nas billeteiras e tamén para reforzar o servizo en bares, restaurantes ou hoteis… De feito, os hoteis da Mariña están cheos polo que os efectos do Resu se estenderon á Terra Chá e a Concellos da Coruña”.
12.300 persoas enchen os 4 cámpings
A Alcaldesa destacou que “Viveiro ten unha ocupación hoteleira do 100% durante toda esta semana. Están ocupadas as 2.000 prazas hoteleiras. O mesmo sucede coas 300 prazas do cámping municipal e coas 12.000 prazas dos cámpings da organización (ResuCamp, BeachCamp e o de Covas). Este volume de visitantes contribúe á dinamización económica e promoción turística do noso Concello”. Dende o BeachCamp e o cámping en Covas haberá servizo de transporte. Os buses saíran sempre que haxa concertos, uns minutos antes de que comecen as actuacións.
4 escenarios e 100 bandas para todos os públicos
Iván Méndez Rodríguez explicou que “este ano, contamos cun recinto máis amplo e máis servizos. O cartel é moi variado, ambicioso e para todos os públicos. Haberá 4 escenarios temáticos e 100 bandas. Poderemos ver lendas da música como Slipknot, Slayer, ParkwayDrive, KingDiamond, WithinTemptation, LambofGod, Gojira, ArchEnemy, Trivium, Testament, MIllencolin, Cradleoffilth, Kvelertak, Culto of Luna, WhileSheSleeps, Converge, TheAdicts, Ignite, Avatar, BerriTxarrake moitos máis”.
Campaña de sensibilización
Loureiro destacou que “dende o Concello de Viveiro, e dentro da nosa defensa dos dereitos das mulleres, promovemos unha campaña para evitar agresións sexistas no Resu, coa instalación dun punto de atención lila, así como con labores de información e concienciación aos visitantes. De feito, haberá voluntarios que percorrerán o recinto repartindo dípticos informativos e facéndose visibles para evitar calquera tipo de agresión que se poida producir. Facémolo como medida preventiva pois nestes 13 anos non houbo ningunha denuncia por agresión sexual”.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
