A Xunta executa actuacións de conservación e limpeza nos treitos interurbanos do río Centiño e o rego da Lagoa ao seu paso polo Concello de Foz

 Santiago de Compostela, 7 de outubro de 2019. A Consellería de Infraestruturas e Mobilidade, a través de Augas de Galicia, vén de iniciar hoxe actuacións de limpeza e conservación nos treitos interurbanos do río Centiño e o rego da Lagoa, no municipio de Foz.

Os traballos de Augas de Galicia coinciden cos tramos deste ríos no seu percorrido polas parroquias de San Martiño de Mondoñedo e Foz, e abarca varios tramos das áreas con Risco Potencial Significativo de Inundacións (ARPIs) neste municipio lucense.

As tarefas que se están a realizar forman parte dos traballos de mantemento destes tramos en áreas con risco potencial de Inundacións, centrándose na retirada de árbores mortas e madeira acumulada, así como elementos susceptibles de causar atoamentos, e tamén rozas selectivas puntuais. Unha vez finalizadas estas actuacións, os tres regos e o río quedarán despexados de maleza, posibilitando así a circulación fluída das súas augas.

Augas de Galicia desenvolve estas accións no marco do programa de mantemento, conservación e mellora do dominio público hidráulico das bacías de Galicia-Costa, no ámbito territorial Galicia-Norte e as súas zonas de acceso e protección.

Mediante este tipo de traballos, o organismo hidráulico da Xunta ten como obxectivo a mellora dos leitos fluviais para acadar condicións naturais do ecosistema que favorezan os aspectos medioambientais e de uso social na contorna do río.