PSdeG-PSOE, Galicia en Común, BNG e En Marea rexistran unha queixa formal no Parlamento para denunciar o veto do PP a súa petición de comparecencias de Feijóo

Santiago de Compostela, 28 de Abril 2020.- Os grupos parlamentarios PSdeG-PSOE, Galicia en Común- Anova Mareas, Bloque Nacionalista Galego e En Marea acordaron presentar no Parlamento un escrito formal de queixa por considerar que se está vulnerando o regulamento da Cámara e coartando os dereitos dos grupos parlamentarios, que teñen como obriga o control do
Executivo e a presentación de medidas de impulso, un labor máis necesario ca nunca no contexto da crise sanitaria, económica e social derivada do coronavirus.
Nun escrito dirixido á Presidencia da Cámara, os grupos poñen como exemplo a petición de comparecencia do presidente da Xunta rexistrada o pasado 6 de abril pero que, a día de hoxe, aínda non se debateu pola Mesa da Deputación Permanente como establece o regulamento. Por contra, xa se ten pronunciado e dado luz verde ás comparecencias solicitadas polo Goberno con data moi posterior. Neste sentido, denuncian, o PP está utilizando a súa maioría como rodillo para maniatar aos grupos e para ter á Cámara a medio gas cando debería estar traballando a pleno rendemento para axudar a saír da crise.
O escrito rexistrado recolle, textual que, “desde a declaración do estado de alarma e de alerta sanitaria por parte dos grupos da oposición do Parlamento galego rexistráronse catro solicitudes de comparecencias con datas de 31 de marzo, 3 de abril, 6 de abril e 13 de abril, ao abeiro do
disposto no artigo 56.4 do Regulamento que dispón que a Deputación Permanente será convocada polo presidente, por iniciativa propia ou por petición de dous grupos parlamentarios ou dunha quinta parte dos membros daquela”.
“A pesar de cumprir con requisitos establecidos no regulamento para a súa convocatoria, por parte da Presidencia non se tramitou nin se emitiu resolución algunha en orde a convocar a Deputación Permanente. No entanto ás solicitudes de comparecencia formuldadas polo Goberno foron atendidas de inmediato”, recolle o escrito.
Así mesmo, engade a queixa formal, “por parte dos grupos da oposición foron rexistradas numerosas iniciativas sen que se chegasen a tramitar, contravindo o proprio informe dos servizos xurídicos da Cámara e vulnerando o artigo 23 da Constitución”. Todo o cal leva aos grupos a solicitar “que se cumpra o regulamento do Parlamento e, co informe emitido polos servizos
xurídicos da Cámara, se tramiten as iniciativas e solicitudes de comparecencia rexistradas polos grupos da oposición”.
Esta denuncia súmase á proposta conxunta rexistrada para reactivar o funcionamento do Parlamento, empezando pola comparecencia do xefe do Executivo que, mentres fuxe da Cámara da soberanía popular, se prodiga en comparecencias en directo desde a televisión pública. Así, desde que o pasado 14 de marzo se declarase o estado de alarma, Feijóo só compareceu unha vez no Pazo do Hórreo, fronte as 21 roldas de prensa en directo e en horario de máxima audiencia en televisión.
O obxectivo desa proposta conxunta por parte dos grupos parlamentarios, con excepción do PP, é reactivar o funcionamento do Parlamento. Para iso, entre as propostas formuladas, a petición de comparecencia semanal de Feijóo mentres dure o estado de alarma e de emerxencia sanitaria e a posibilidade de presentar todo tipo de iniciativas de impulso con excepción de proxectos de lei