A CIG-Ensino da Mariña, ante a grave situación sanitaria, esixe que se extremen as medidas de protección da saúde tanto para o profesorado como para o alumnado na realización dos exames da ABAU en Viveiro

 A Mariña, 4 de xullo, 2020, A CIG-Ensino da Mariña, ante a grave situación sanitaria derivada do brote do covid-19 na nosa comarca, quer dirixirse publicamente á CIUG (Comisión Interuniversitaria de Galiza, responsábel da organización da Selecitivade) e á Consellaría de Educación esixindo que se extremen as medidas de protección da saúde tanto para o profesorado como para o alumnado na realización dos exames da ABAU en Viveiro os próximos días 7, 8 e 9 deste mes.

Asimesmo, e dado que pode haber algunha alumna ou alumno confinado neste momento, pedimos que se respecten os seus dereitos a realizar o exame, e se promovan todas as medidas necesarias para que así sexa.

Desde a CIG – Ensino non podemos máis que criticar a falta de previsión da Consellaria de Educación no que respecta ás súas obrigas para co profesorado e alumnado, o que implica a constante improvisación. No momento en que o conxunto da comunidade educativa galega estamos aínda sen coñecer nin o máis mínimo dato das decisións que ten pensado adoptar a Xunta para o comezo de curso escolar, negando de momento a negociación coas organizacións sindicais, asistimos a unha desidia e unha parálise no rebrote da Mariña, xusto cando se debe actuar con rigor e responsabilidade. E isto é algo que non podemos nin debemos consentir.