Lugo, 17 de xullo de 2020. O Presidente da Deputación de Lugo, José Tomé Roca, e a Deputada de Promoción do Territorio, Turismo e Réxime Interior, e voceira socialista do Gobenro, Pilar García Porto, mantiveron na mañá deste venres un almorzo informativo con xornalistas da provincia con motivo do seu primeiro ano de mandato á fronte da institución. O mandatario provincial realizou un repaso polas principais liñas de traballo do Goberno que dirixe, dos proxectos que están en marcha e marcou a folla de ruta que a institución vai seguir no novo escenario que se abre logo da crise do coronavirus Covid-19. José Tomé asegurou que á volta do verán o Goberno comezará a traballar nos orzamentos do 2021 para telos aprobados este ano e poder comezar a executalos a principios do vindeiro, e anunciou que vai “reactivar a captación de fondos da Unión Europea para relanzar a economía e o emprego despois da crise sanitaria e para aproveitar as potencialidades da provincia nestes momentos que é tan necesario”.
“Creo que este primeiro ano de mandato foi bo para a provincia e para todos os veciños e veciñas. Hoxe a institución que dirixo é noticia polo seu traballo, polos seus proxectos e polo debate políticos dentro das canles normais que marca a democracia”, explicou o Presidente. Tomé Roca destacou a estabilidade do Goberno, cunha boa relación entre os dous socios baseada na confianza e no diálogo, o que permitiu, entre outras cuestións, disolver SUPLUSA e aprobar os orzamentos 2020 en tempo e forma.
Un dos temas centrais que marcaron as actuacións da Deputación nos últimos meses foi a xestión da crise da Covid-19. “Esta é unha situación grave, imprevista e inédita, que dende a Deputación fomos capaces de dar resposta de maneira áxil e eficaz aos concellos e á veciñanza”. O Presidente deu conta das principais medidas que adoptou a institución, dende as medidas de seguridade adoptadas, os protocolos nos centros de maiores, a campaña EN LUGO,SI para a reactivación do comercio, a hostalería e o turismo, ata a adaptación do Plan Único para que os concellos poidan destinar a metade dos recursos a afrontar a crise e a mobilización de preto de 70 millóns de euros dende o inicio da pandemia para poñelos a disposición dos municipios e do tecido social e produtivo”.
Cooperación cos concellos
O Presidente subliñou que neste ano a Deputación demostrou tamén a capacidade de cooperación cos concellos de todas as cores políticas, e co resto de administracións.
“Reforzamos o papel da Deputación como Concello dos Concellos, a través de instrumentos esenciais como o Plan Único, que subimos ata os 21,3M€, e outros plans, como o de dotación de marquesiñas, o de aforro enerxético Ilumin@ ou de instalación de desbriladores, entre moitos outros”, asegurou.
A maiores, a Deputación firmou neste último ano convenios con concellos de toda a provincia por importe de 2,6M€, ademais de facilitarlles ás entidades locais os medios do Parque Móbil ou todo tipo de asistencia técnica.
“Creo que é o momento de reivindicar o municipalismo, facer unha revisión en profundidade das facendas locais, porque os concellos estamos asumindo cuestións que non son da nosa competencia directa”, indicou.
Servizos sociais e infraestrutras
En materia de servizos sociais, ademais de destacar que a Deputación destina o 33% do Orzamento a políticas sociais e que cre no público, o Presidente fixo un repaso da actual situación dos catro centros de maiores que a institución ten funcionando na provincia e dos que están a piques de abrir ou en construción. “Abrimos o da Fonsagrada hai uns meses, asinamos o convenio marco do concello de Castroverde, contratamos o equipamento da de Pedrafita do Cebreiro, recibimos as obras da de Meira, asinamos o protocolo para construír a de Pantón, adxudicamos a de Portomarín e iniciamos as obras da de Guitiriz”.
Neste sentido, confirmou que antes de finalizar o ano abrirán os centros de maiores de Castroverde e Pedrafita.
Tomé Roca apuntou que debido á crise da Covid-19 se está demostrando que o modelo provincial de residencias funciona e é necesario porque “é público, de proximidade, e non busca o negocio. Garantimos o benestar e a calidade de vida dos nosos maiores e das súas familias, e tamén das comarcas nos que están ubicados, xa que xeran empregos que fixan poboación no rural”.
O Presidente, como encargado directo da área de Xestión Territorial, destacou que a prioridade en materia de infraestruturas é o reequilibrio territorial, “iso do que tanto se fala e que logo nunca se leva á práctica, porque nunha houbo un plan de reequilibrio territorial para Galicia, dende a Deputación intentamos levalo adiante”.
José Tomé lembrou que a Deputación ten a rede de estradas provincial máis extensa do Estado, e que lle dedica moitos recursos. Así, apunto, destina 6,4M€ en conservación ata o 2021. Como exemplo de xestión apuntou que, este ano, por primeira vez, comezaron os desbroces a primeiros de xuño, que a día de hoxe a Deputación ten obras en marcha en estradas da súa titularidade por valor de 4,6M€ e que antes de finalizar o ano se adxudicarán obras por outros 3M€.
Turismo e sectores produtivos
O Presidente destacou o traballo da Deputada de Turismo, Pilar García Porto, por trazar unha nova folla de ruta adaptada á nova realidade que trouxo consigo o coronavirus en sintonía co sector.
Como proxecto destacado puxo a creación do Parque Central de Galicia en Antas de Ulla, no “epicentro” da comunidade autónoma, un ambicioso proxecto que suporá un revulsivo turístico e económico para a zona e para toda a provincia, que, segundo avanzou o Presidente, estará previsiblemente rematado entre finais do 2021 e principios do 2022.
Tamén destacou o bo funcionamento das rutas fluviais en catamarán pola Ribeira Sacra, con máis de 2.500 viaxeiros dende a súa activación a mediados de xuño; a entrada da Deputación na Rede de Destinos Turísticos Intelixentes; e o apoio ao sector audiovisual para promocionar a provincia con colaboracións como a da serie de proxección internacional O Sabor das Margaridas. “Produtores importantes téñense dirixido a nós para establecer liñas de colaboración”, indicou o Presidente, quen asegurou que a provincia se está a converter nun “plató de rodaxe”.
Outro dos puntos que marcaron a intervención do Presidente foi o impulso decidido da Deputación do sector primario, sinal de identidade da provincia. “Ademais das colaboracións económicas co sector e coas asociacións profesionais, traballamos por consolidar o papel da Granxa Gayoso Castro como motor do sector agrogandeiro da provincia, mostra é a Granxa Experimental de Leite ou o protocolo para crear no recinto un centro de recría de porco celta”. Tamén fixo referencias á Finca de Tor, en Monforte de Lemos, onde “temos un ambicioso proxecto de produción ecolóxica” para convertela nun motor do sector primario.
Alcoa
O Presidente tamén fixo referencia a asuntos de actualidade da provincia, como a situación dos traballadores da fábrica de Alcoa e das empresas auxiliares. “Sempre estivemos do lado dos traballadores e traballadoras” e “fomos os primeiros, nada máis coñecer o anuncio do despido colectivo, en plantexar o que agora din outras administracións: a intervención da empresa, que devolva as axudas públicas por manter o emprego e facer o mantemento da planta, algo que non cumpriu, e a posibilidade de vender”, asegurou.
Así mesmo, “dende a lealdade”, o Presidente dixo que seguirá reivindicando á Xunta de Galicia “o que é de xustiza para a provincia”, referíndose a infraestruturas pendentes “por máis de 150M€”, como, entre outras, o corredor Sarria-Nadela, a variante de Viveiro, o acceso ó porto seco de Monforte, a segunda fase da Ronda Leste, o remate do Plan Paradai ou as EDAR de Burela, Foz e Monforte, ademais da mellora de diversas estradas de titularidade autonómica.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
