Deportes promove o premio Volante Deputación, que se celebrará o 3 e 4 de outubro no circuíto da Pastoriza

 Lugo, 30 de setembro . A área de Deportes promove a novena edición do premio Volante Deputación, que se celebrará os vindeiros 3 e 4 de outubro do circuito da Pastoriza e que pretende achegar a afeccionados e afeccionadas ao rallie ás probas de competición.

O programa, que presentaron esta mañá o deputado de Deportes, Efrén Castro, a tenente de alcalde da Pastoriza, Elva Carreira e o director de PTC Escuela, Antonio Solórzano, ofrece aos participantes unha parte formativa, na que adquiren e melloran a súa destreza ao volante, e outra puramente competitiva, na que disputan probas cronometradas con coches facilitados pola organización.

O premio para o gañador ou gañadora é a participación no Rallie San Froilán, a bordo dun Dacia Sandero Cup do equipo Trs Racing Team.

O prazo para anotarse manterase aberto ata o vindeiro venres, 2 de outubro, ás 14.00 horas. O formulario para anotarse pode descargarse na web de PTC Escuela.

O deputado de Deportes, Efrén Castro, sinalou que “o Volante Deputación se converteu nunha referencia para os afeccionados e afeccionadas ao motor, que teñen nela unha porta de entrada ao mundo da competición automobilística” e destacou a “compoñente formativa do evento” que, recordou, “se celebrará tendo en conta todos os protocolos establecidos polas autoridades sanitarias”-

Nesa liña, Antonio Solórzano, explicou que “as probas cronometradas se organizarán de forma que se farán grupos máis reducidos do habitual para facilitar o mantemento da distancia social”. O director de PTC Escola amosouse satisfeito pola resposta á convocatoria, “as inscricións van a moi bo ritmo, xa temos máis da metade das prazas cubertas”.

Pola súa banda, a tenente de alcalde da Pastoriza, Elva Carreira salientou a importancia “de sacar adiante a proba, tomando todas as medidas de prevención precisas” e convidou aos afeccionados e afeccionadas ao motor a anotarse e participar.