Lugo, 1 de xullo de 2021. O Centro de Artesanía e Deseño bota a andar o programa “Lugo é Artesanía”, con visitas a unha vintena de obradoiros das distintas comarcas durante os meses de xullo, agosto e setembro.
As visitas guiadas ofrécense en dous formatos, baixo o epígrafe, Xornadas Viaxeiras, no que as persoas asistentes se achegarán, nun mesmo día, a diferentes obradoiros dentro de cada comarca para afondar na relación que cada oficio garda coas características físicas do territorio no que se ubica e tamén no seu patrimonio cultural e etnográfico; e Experimenta Artesanía, no que se propón profundizar nas técnicas e nos proxectos profesionais e vitais de cada artesán ou artesá.
O deputado de Artesanía e Deseño Efrén Castro explicou que “é unha iniciativa pensada para que as persoas participantes coñezan os obradoiros como espazos de traballo e de creación de obxectos únicos, pero tamén para poñer en valor, a través deles, os elementos culturais, patrimoniais e naturais de cada comarca”
“Confiamos en que esta primeira edición do programa poida servir como punto de partida para a creación dunha rede de talleres visitables, que contribúa a mellorar as condicións económicas e de competitividade da artesanía e sirva tamén de base para ampliar o recoñecemento da artesanía en Galiza e fóra”, apuntou o responsábel da área da Vicepresidencia, que puxo énfase no traballo realizado desde o Centrad nos últimos meses para a promoción da artesanía como recurso cultural e como actividade económica, “sostible, pegada á terra e xeradora de oportunidades para a fixación de poboación no rural”.
As actividades estarán guiadas por Guido Álvarez e realizaranse en grupos reducidos, cun número de prazas establecido en función do espazo do que dispón cada obradoiro e a observación significativa da actividade que se desenvolve neles.
As persoas interesadas en participar nas visitas deben inscribirse previamente a través do enderezo electrónico info.centrad@deputacionlugo.org ou no teléfono 982210066. O prazo ábrese o luns, 5 de xullo, ás 9.00 horas. As solicitudes atenderanse por orde de inscrición ata completar a capacidade.
XORNADAS VIAXEIRAS
1.- XORNADA MONDOÑEDO, 10 de xullo
Nesta primeira xornada faremos un percorrido pola cidade histórica de Mondoñedo e visitaremos o barrio dos Muíños para coñecer o escenógrafo e titiriteiro Ton Arenas, o canteiro Fernando Vilariño e os talleres de cerámica Esquina Atlántica e de serigrafía artística Estudio Estampa.
Máximo 20 persoas
2.- XORNADA SUR (Ribeira Sacra e Sarria), 17 de xullo
Na segunda das xornadas coñeceremos a olería da Reitoral de Gundivós e do Obradoiro Fígulus, visitaremos unha barreira e un forno comunitario e xantaremos de pícnic nun dos marabillosos miradoiros da Ribeira Sacra para continuar camiño cara ao obradoiro do luthier Germán Arias en Sarria.
Máximo 15 persoas
3.- XORNADA TERRA CHÁ (Outeiro de Rei e Xermade), 21 de agosto
Na terceira xornada viaxeira visitaremos terras chairegas para coñecer o traballo artesán de Idoia Cuesta e Xaneco. Xantaremos de pícnic en Penas de Rodas e, pola tarde, visitaremos o torneiro Vicente Ledo na aldea artesá da Fraga.
Máximo 15 persoas
4.- XORNADA LUGO, 11 setembro
A cuarta xornada viaxeira será, integramente, a pé, faremos visitas culturais á cidade de Lugo e coñeceremos de preto o traballo de construción de gaitas de Lis, o deseño en cerámica de Mi madre no me deja e a marroquinería de Querqur Leathercraft.
Máximo 15 persoas
5.- XORNADA LUGO, 12 de setembro
Na quinta xornada viaxeira continuaremos a pé con visitas culturais á cidade de Lugo, de camiño aos obradoiros de cerámica, gravado e cartón pedra de Ceniza de Papel, Augatinta e Marga Portomeñe.
Máximo 15 persoas
6.- XORNADA MARIÑA, 18 de setembro
A sexta xornada visitaremos a obra do artista e ceramista Caxigueiro, no Espazo Caritel en Foz, percorreremos a Península da Paz, San Cibrao, onde visitaremos o carpinteiro de ribeira, Francisco Fra, para dirixírmonos ao monte de San Roque onde xantaremos de pícnic. Para finalizar a xornada, visitaremos o complexo Regal Xunqueira e coñeceremos, de preto, o traballo de Alfonso Otero Regal.
Máximo 15 persoas
7.- XORNADA RIOTORTO, 25 de setembro
Na sétima e última xornada coñeceremos o traballo dos ferreiros de Riotorto, a extraordinaria paisaxe que os acolle e a arquitectura etnográfica do seu oficio.
Máximo 15 persoas
EXPERIMENTA ARTESANÍA. Turismo Artesanal Activo
1.- VINUM ET LÚTUM, 11 de xullo
Reitoral de Gundivós, Sober
Máximo 15 persoas
Horario de 9.00 h a 17.00 h
2.- ARTE E CERÁMICA, 18 de xullo
Regal Xunqueira, Viveiro
Máximo 22 persoas
Horario de 10.00 h a 14.00 h
3.- OLARÍA TRADICIONAL DA RIBEIRA SACRA, 1 de agosto
Obradoiro Fígulus, Proendos, Sober
Máximo 15 persoas
Horario de 10.00 h a 20.00 h
4.- MAIS QUE BARRO, 8 de agosto
Obradoiro Ceniza de Papel, Lugo
Máximo 8 persoas
Horario de 11.00 h a 18.00 h
5.- O TORNEADO: UN OFICIO SECULAR, 22 de agosto
Aldea artesá da Fraga, Lugar de Cazás, Xermade
Máximo 3 persoas
Horario de 10.00 h a 18.00 h
6.- O MUNDO DOS BARCOS DE MADEIRA: DESEÑO E TRAZADO, 29 de agosto Estaleiros Fra, San Cibrao Lugo Máximo 6 persoas
Horario de 10.00 h a 18.00 h
7.- AO REDOR DA MÁSCARA ROMANA, 5 de setembro
Obradoiro Marga Portomeñe, Lugo
Máximo 12 persoas
Horario de 10.00 h a 19.00 h
8.- TECENDO A NATUREZA, 19 setembro
Obradoiro Idoia Cuesta, Outeiro de Rei
Máximo 8 persoas
Horario de 10.00 h a 18.00 h
O alcalde, Dani Vega, fixo un balance moi positivo: “foi un concerto moi especial nun marco espectacular, como é a igrexa parroquial de Ribadeo, e no que o gaiteiro Carlos Núñez encandilou aos asistentes co seu repertorio. Todos os asistentes disfrutámolo moito”. Xunto a Carlos Núñez estiveron o rexedor e as concelleiras de Cultura, Turismo e Seguridade, Begoña Sanjurjo, Marta Saiz e Montse Seijo.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
