Formoso salienta que a lei de pesca sostible recolle a “reivindicación histórica” das mulleres do mar de Galicia ao reducir 4 anos a idade de xubilación

O líder do PSdeG sinala que o texto “recoñece a dureza do traballo de colectivos tan importantes como as mariscadoras a pé ou as redeiras”

Noia, 18 de maio de 2022. O secretario xeral do PSdeG, Valentín González Formoso, salientou hoxe en Noia que a Lei de Pesca Sostible, que vén de ser aprobada polo Consello de Ministros e comezará o debate parlamentario, recolle a “reivindicación histórica” das mulleres do mar de Galicia ao reducir en 4 anos a súa idade de xubilación.

Formoso mantivo un encontro coa Asociación Mulleres Salgadas e mariscadoras de Muros, Noia e Boiro, coas que analizou o impacto desta nova norma que permitirá aplicar esta reivindicación, reclamada dende hai máis de 20 anos, nos que leva vixente a actual Lei de Pesca Marítima do Estado.

O responsable socialista lembrou a conmemoración, hoxe 18 de maio, do Día Internacional da muller no sector marítimo, e sinalou a relevancia dun texto que “recoñece a dureza do traballo en colectivos tan importantes como son as mariscadoras a pé ou as redeiras”. Grazas a esta norma, o seu traballo verase equiparado ao dos homes do mar ou outros tipos de marisqueo.

Sinalou que os socialistas galegos “vamos pelexar no trámite de emendas” para incorporar ao colectivo das mulleres bateeiras, que “deben de estar tamén recoñecidas” nesta Lei por “sentido común e por xustiza”.

Valentín González Formoso salientou o avance histórico desta norma para 4.700 mariscadoras, redeiras, percebeiros, recolledores de algas e buzos de Galicia, que verán incrementada a protección de cara á súa xubilación. A ampliación do coeficiente redutor da idade mínima para a xubilación, que pasa dun 0,10 a un 0,15, recolle unha demanda destes colectivos que fai xustiza á dureza das súas profesións.

Xustas demandas

A aprobación da norma polo Consello de Ministros permite reducir a idade de xubilación destes colectivos, que poderán xubilarse catro anos antes da idade mínima. Salientou que o goberno demostra así que atende ás xustas demandas destes colectivos, que se verán equiparados aos mariñeiros que traballan en embarcacións de ata 10 toneladas de rexistro bruto.

A nova norma regula ademais unha utilización máis eficiente e flexible das cotas de pesca, co que facilita a planificación empresarial e optimiza o uso das cotas de pesca e dos días de esforzo asignado a España. Establece sistemas de xestión que habilitan un uso máis eficiente e flexible das cotas de pesca, e deixa aberta a posibilidade de retirar as cotas aos beneficiarios que as teñan sen utilizar.

A Lei de Pesca Sostible e Investigación Pesqueira, que inicia agora o seu trámite parlamentario, atende ao Pacto Verde Europeo a consegue garantir o equilibro entre a conservación do medio mariño e o desenvolvemento dunha actividade pesqueira rendible, atractiva para o desenvolvemento empresarial e o relevo xeracional, e consolide un sector moderno e competitivo.