O Presidente da Deputación inaugura a Feira do Butelo da Fonsagrada, “exemplo da enorme capacidade que temos no rural para crear actividade económica”

Unha carpa de 1.200 metros cadrados alberga esta cita gastronómica, que reúne entre hoxe e mañá a máis de 70 expositores

Lugo, 3 de febreiro de 2024. O Presidente da Deputación de Lugo, José Tomé Roca, acompañado do Alcalde, Carlos López, e de deputados e deputadas provinciais, participou este sábado na inauguración da XXVII Feira do Butelo que se celebra esta fin de semana na Fonsagrada. O Concello, organizador do evento, instalou unha carpa de 1.200 metros cadrados fronte á Casa Consistorial para albergar a cita gastronómica, que reúne entre hoxe e mañá uns 70 expositores e na que está previsto que se vendan 10.000 quilos de produtos cárnicos.

“Esta feira é un exemplo da enorme capacidade que temos no rural para crear actividade económica. Demostra que o rural está cheo de vida, de oportunidades e de proxectos todos os días do ano”, asegurou o Presidente, quen destacou o “esforzo co rural que estamos facendo dende hai moito tempo dende o Concello da Fonsagrada e dende a Deputación de Lugo”.

O mandatario provincial felicitou ao Alcalde por liderar “o éxito colectivo” que supón a Feira do Butelo, “ao que temos a honra de contribuír dende a Deputación de Lugo prestando a nosa colaboración económica”, nesta edición por importe de 20.000€. A cita, subliñou, “continúa medrando ano tras ano grazas ao bo traballo dos produtores, dos hostaleiros e do comercio; da implicación dos veciños da Fonsagrada; e do impulso do Concello”.

Neste sentido, destacou que a feira, de Interese Turístico galego, “é un referente para toda a provincia de Lugo, para toda Galicia, e cada vez para máis visitantes que chegan doutros puntos de xeografía española”.