O Alcalde de Foz anuncia obras de mellora en viais do municipio por un importe de 443.170 €

Foz, 18 de xaneiro de 2025. O alcalde de Foz, Fran Cajoto, anuncia obras de mellora de firme en viais do municipio de Foz por un importe de 443.170,32 euros.

Despois dun procedemento de licitación aberto, Fran Cajoto informa da adxudicación este venres á empresa Construcciones Isidro Otero SL da mellora de viais municipais en Cordido, Marzán e Vilaxoane por un importe de 50.951,42 euros. financiados con cargo ao Plan Deputación 2024: “son viais municipais con firme en mal estado, que se vai a renovar por completo con aglomerado en quente. Ademais, imos limpar cunetas e taxeas e completar a actuación con sinalización horizontal e vertical. Estamos a falar en Vilaxoane do camiño do Muíño, que baixa ao río Centiño desde a estrada LUP2001 e continúa para dar servizo a varias vivendas ata o límite coa estrada nacional; en Cordido do camiño que une a Tilleira cos Moás e que é moi utilizado polos veciños desta parroquia; e en Marzán imos mellorar o firme nas Catro Calles entre o Cristo e a rúa de Francia, no camiño de Prado da Lama e no vial que conecta a Pena Parda e Prado da Lama, por detrás do Clube de Tenis e o apeadoiro do tren”.

Este venres ademais foi aprobada en Xunta de Goberno da Deputación de Lugo a licitación da mellora do firme en distintos viais titularidade do organismo provincial, por un importe total de 392.218,9 EUR. O prazo de presentación de ofertas remata o 12 de febreiro e o prazo de execución das obras unha vez rematados todos os trámites é de 3 meses.

“Agradézolle á Deputación de Lugo e ao presidente José Tomé a inversión que vai a facer en Foz, atendendo ás peticións máis urxentes que lle achegamos nun dosier preparado polo Concello. Na estrada LUP6303 vaise a renovar o firme en 2,1 quilómetros da parroquia de Cordido ata o límite co Concello de O Valadouro, limpar marxes e dispoñer nova sinalización horizontal e vertical. Na estrada á Basílica de San Martiño, entre Vilaxoane e Ver, vaise a fresar o firme e aglomerar naqueles puntos que estean en mal estado, limpar as marxes dos seis quilómetros de estrada, renovar a pintura en toda a lonxitude e reforzar a seguridade en zona de curvas con 50 metros adicionais de bionda e o aumento da sinalización vertical. En Nois no entorno do colexio vaise a mellorar o firme e dispoñer nova sinalización vertical para mellorar a seguridade na entrada e saída das aulas. Na estrada á Hermida e Oirán vanse a mellorar a drenaxe e a circulación limpando as marxes en máis de catro quilómetros. Nas rúas Mijail Gorbachov e Corporacións Municipais vaise a fresar o firme actual e dispoñer unha nova rodadura con aglomerado en quente, con sinalización vertical e horizontal. Vaise a renovar a pintura da estradas provinciais que conectan a praia da Rapadoira con Llas e a Fonte de Marzán, mellorando o firme no entorno da fonte e tamén no tramo de Paseo de Colón que discorre entre Mariñeiro Chila e Rego de Foz. A última actuación que se inclúe no proxecto é a mellora do firme na estrada que une a Fonte de Marzán e o Bispo Santo, que se encontra en moi mal estado”, explica o alcalde.

“Seguimos traballando para mellorar o estado da rede de estradas e camiños deste concello. Son boas novas que se unen ao convenio recentemente asinado coa Deputación para o arranxo das rúas Alfonso X e Alfredo Brañas, á execución das dúas novas rotondas de Cangas e a novos proxectos que estamos preparando para facilitar os desprazamentos no noso municipio”, remata o rexedor municipal.