CIG-SAÚDE denuncia as carencias dun “Hospital da Mariña incapaz de cubrir as necesidades sanitarias da veciñanza da comarca”

A Mariña, 12 de marzo, 2025. O pasado fin de semana, numerosos pacientes percorreron as estradas rumbo ao Hula “pola incapacidade do Hospital da Mariña para dar resposta ás necesidades sanitarias que se xeran na Comarca. Un incesante ir e vir de ambulancias, carrexaron de xeito incesante, pacientes que deberan ser asumidos no hospital Mariñán. A situación semellou ser de guerra, foi tal o número de pacientes desprazados a Lugo que, as ambulancias destinadas a traslados urxentes, deseñadas para un máximo de dous pacientes, deixaron de ser útiles, dando paso á utilización de ambulancias destinadas ao transporte de pacientes que acoden a rehabilitación ou a diálise, as coñecidas como de transporte colectivo. A prioridade non era a calidade sanitaria, a prioridade era evacuar pacientes cal campo de batalla e así, deste xeito, polo que fomos coñecedores, grupos de ata 5 pacientes nunha mesma ambulancia e ao cargo de unha soa enfermeira, emprendían viaxe interhospitalario dende un hospital de batalla totalmente degradado, o de A Mariña, ata o HULA, algo insólito na sanidade que ata o de agora coñecíamos”.

A CARENCIA DE MÉDICOS ELEVA O ESTADO DO HOSPITAL DA MARIÑA A ALERTA VERMELLA

O 15 de xaneiro pasado a CIG-Saúde A Mariña alertaba que “o noso Hospital atopábase en ALERTA VERMELLA e a data de hoxe, so podemos dicir que a situación lonxe de mellorar, agravase día a día sen que os responsables que se atopan acomodados nos despachos, Directores, Xerentes e demais cargos políticos, fagan nada para reverter a situación. Seguimos sen a dotación mínima de Facultativos especialistas en Psiquiatría, Radioloxía, Neuroloxía, Cardioloxía, Uroloxía, Dixestivo ou Medicina Interna, detonante de que este fin de semana se carrexaran masificadamente pacientes da Mariña para ingresar ou diagnosticar no Hula”.

“A maiores das carencias en materia de Recursos Humans, ao comezo da tarde do sábado, producíase avaría no TAC, quedando inoperante todo o fin de semana e ata última hora do luns, xa que o servizo de mantemento destes aparellos foi privatizado e da empresa privada, non se personaron para reparalo ato o luns as 15 horas. Dito aparello radiolóxico, de vital importancia para o diagnóstico, xerou un incremento de traslados de pacientes a Lugo así como un considerable atraso nos seus diagnósticos, dándose casos de pacientes que permaneceron en urxencias ata 24 horas para ser diagnosticados e ingresados”.

“A situación de DEGRADACIÓN na que se atopa o Centro Hospitalario e a veciñanza da Mariña ten responsables. Tanto a Dirección do Hospital da Mariña como o Xerente da Área Sanitaria como o propio Conselleiro son responsables da DEMOLEDORA situación na que se atopa a Sanidade na Mariña. Volverán a dicir que “si a CIG sabe onde hai médicos que nolo digan” polo que dende CIG-Saúde xa adiantamos que son estes dirixentes os que cobran, e non pouco, por dotar do persoal necesario ao centro hospitalario e demostrado que non están capacitados para garantir unha sanidade de calidade e proximidade, ante o evidente fracaso, deberan DIMITIR”.

Dende a Central Nacionalista non imos deixar de BERRAR “onde están os MAIS E MELLORES SERVIZOS” que falsamente nos venderon. Este é o froito das políticas sanitarias do Partido Popular polas cales “atopámonos con menos e peores servizos, máis derivacións e ingresos no HULA de pacientes da Mariña, e a imposibilidade de garantir una sanidade equitativa, digna e de proximidade a todas e todos os que vivimos na Mariña”.