Pontón insta a Rueda a escoitar o clamor social e dar carpetazo definitivo á bomba ambiental de Altri

Pregunta a Rueda: “Quere valerse dun suposto acosador sexual para chegar á Deputación de Lugo?”

Santiago de Compostela, 17 decembro 2025. A portavoz nacional, Ana Pontón, instou ao titular da Xunta, Alfonso Rueda, a escoitar o clamor social e dar carpetazo á bomba ambiental de Altri, que “é o que lle está pedindo a cidadanía” ao respecto dunha macrocelulosa contaminante “que está poñendo en risco o río Ulla, a ría de Arousa e miles de postos de traballo”, remarcou.

“Vai vostede darlle carpetazo definitivo a esa macrocelulosa, si ou non?”, cuestionou a Rueda nunha sesión de control na que lle pediu que escoite aos miles de galegos e galegas que o pasado domingo en Santiago “lle volveron dicir nunha masiva mobilización Galiza si, Altri non”.

Miles de galegos e galegas, remarcou, que lle volveron recordar ao titular do Executivo que “a vida da xente do rural e da xente do mar é máis importante que a conta de resultados dunha empresa portuguesa” e que non se pode converter o monte galego “nun gran eucaliptal”. “A cuestión é se vostede vai escoitar aos galegos e ás galegas ou vai seguir de comercial de Altri”, interpelou.

Pontón pediu a Rueda que “non se esconda detrás dos técnicos” -aos que por certo cambia cando non lle dan a razón para poñer, por exemplo, a excargos do PP a asinar os informes que xa tiñan elaborados- porque “todo o mundo neste País sabe que esta decisión é unha decisión política que tomou o Partido Popular antes de que houbera nin un só informe sobre a mesa”.

Un proxecto contaminante, engadiu, que exemplifica ademais por que o do PP é un “bulogoberno”, xa que presentou como unha biofábrica téxtil o que, pasadas as eleccións, se soubo que era “unha macrocelulosa capaz de poñer en risco o río Ulla e a ría de Arousa e levarse por diante miles de postos de traballo”.

A portavoz nacional tamén cuestionou ao presidente da Xunta por que está ocultando o memorándum asinado con Altri. “Que é o que ten que ocultar?”, cuestionou, para recriminarlle que “o que non pode ocultar é que goberna para as empresas amigas do Partido Popular”.

Neste sentido, recordou que a empresa portuguesa ten como socia a Greenalia, firma na que traballa a súa compañeira de partido e exconselleira, Beatriz Mato. “As portas xiratorias sempre ben engraxadas no Partido Popular”, sintetizou.

Un exemplo que non é o único de como o PP traballa para as súas empresas amigas, alegou para criticar a continuación o que está pasando co grupo Ribera Salud, propietario de Povisa e co que o Sergas ten “un acordo secreto por valor de 98 millóns de euros”.

Pontón reprochou ao titular do Executivo que non envíe ao Parlamento e oculte á cidadanía o contido deste contrato millonario, pese a saber como actúa Ribera Salud, en referencia aos audios publicados sobre a súa xestión no hospital de Torrejón de Ardoz e que desvelan que o seu obxectivo é aumentar beneficios a costa de recortar en saúde.

“Pregúntolle se pode garantir que esas prácticas non se están producindo en Povisa”, interpelou a un Rueda ao que retou a facer público o contrato millonario entre o Sergas e Povisa e a realizar unha auditoría externa para garantir que “cos cartos dos galegos e das galegas, esa empresa non está facendo negocio a costa da saúde”.

Por outra banda, a líder nacionalista aproveitou o último Pleno do ano para lanzar unha mensaxe ao conxunto da sociedade e moi especialmente ás mulleres: “Tolerancia cero ante a violencia machista, veña de onde veña e afecte a quen afecte”, proclamou en referencia aos casos coñecidos ao longo do ano no ámbito público.

“Ao longo deste 2025, coñecemos comportamentos machistas repugnantes e creo que hai que dicir sen medias tintas que a resposta que se lle deu non estivo á altura cando afectou a responsables políticos”, afondou, para recalcar que “os casos de violencia machista non poden quedar impunes” e que hai que estar “sempre do lado das mulleres”. Por iso, considerou “o feminismo máis necesario que nunca” neste contexto e fixo un chamamento a “traballar pola igualdade real, con máis convicción para que non haxa nin un só pas atrás”.

A portavoz do BNG reafirmou na súa réplica a posición de “tolerancia cero co machismo”, tal e como demostrou desde o minuto cero no caso do dimitido presidente da Deputación de Lugo e criticou a Rueda que pretendese dar leccións de feminismo cando “durante meses tivo sentado ao seu carón no Consello da Xunta a un conselleiro que sabía que tiña unha denuncia presentada na Policía por agresión sexual”.

“A pregunta que ten vostede que responder é se quere valerse dun suposto acosador sexual para chegar á Deputación de Lugo”, cuestionou ao titular do Executivo, ao que lle recriminou que o que demostra o PP é que lle importan “un pepinillo en vinagre as mulleres”. “Non lles importan nada, o único que lles importa é o poder polo poder, ese é o seu compromiso coas mulleres”, concluíu.