Foz, 20 de agosto de 2026. A VI Panceparty celebrarase en Foz, concretamente no Campo da Cabana, este sábado, día 22 de agosto.
A organización explica que a Panceparty “é unha cita gastronómica e festiva que alcanza xa a súa sexta edición e que se consolidou como un dos eventos do verán no municipio. A celebración naceu en 2018 co obxectivo de render homenaxe a un dos produtos máis populares da gastronomía galega, a panceta de porco, e desde entón non deixou de crecer. Ano tras ano a afluencia de público foi en aumento, convertendo a Panceparty nunha cita cada vez máis multitudinaria e esperada tanto por veciños como por visitantes. A programación arrincará ás 13.00 horas cunha sesión vermú acompañada de música en directo. Durante esta primeira parte da xornada tamén haberá servizo de pulpeiro, dispoñible ata as 15.00 horas, para quen queira desfrutar dunha comida no propio Campo da Cabana. A actividade retomarase ás 19.00 horas coa tradicional degustación gastronómica. Os asistentes poderán elixir entre unha ración de paceta con chourizo, pan e auga ou viño por 13 euros, ou unha ración de lagostinos con pan e auga ou viño, tamén por 13 euros. Ambas as opcións inclúen ademais a posibilidade de participar nos sorteos organizados durante a xornada”.
Tamén anuncian que “a música será outro dos grandes protagonistas desta edición. O dúo Puma será o encargado de poñer ritmo á festa, mentres que Puzzle Animación ocuparase de dinamizar o evento con diferentes propostas para o público”.
Os organizadores esperan “repetir o éxito das últimas edicións e continuar coa tendencia ascendente de participación que acompañou á Panceparty desde os seus comezos. A combinación de gastronomía, música, animación e ambiente festivo volve converter o Campo da Cabana no punto de encontro para unha xornada pensada para desfrutar en compañía. As entradas poden adquirirse de forma anticipada, unha opción que permite ademais evitar as colas de acceso”.
A organización corre a cargo do colectivo focego Éche o que hai, coa colaboración do Concello de Foz e do departamento de Cultura da Vicepresidencia da Deputación de Lugo.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.