Programa de educación sexual “Coñécete” para os institutos de Viveiro

Viveiro, 8 de xaneiro de 2019. O Concello de Viveiro vai desenvolver nos institutos do municipio un programa de educación sexual centrado na adquisición de coñecementos, estratexias e habilidades para promover unha educación sexual adecuada e sana. O seu obxectivo é que, ao finalizar o programa, os alumnos teñan adquirido as seguintes aprendizaxes:

– Conceptos como sexo, erótica, sexualidade, orientación e identidade.
– Os tres obxectivos centrais da educación sexual: coñecerse, aceptarse e aprender a expresar a erótica de forma que os asistentes se sintan a gusto cos seus corpos.
– Identificar os estereotipos e crenzas sobre a sexualidade.
– Coñecer a influencia dos medios de comunicación sobre a imaxe corporal.
– Mitos sobre o amor romántico.
– Xestión dos celos, do abuso e control.
– Estratexias para xestionar a anticoncepción.
– Métodos para previr os embarazos non desexados e das infeccións de transmisión xenital.
– Hábitos de hixiene e auto coidado.

Este programa vai dirixido ao alumnado de 3º e 4º da ESO do IES María Sarmiento e do IES Vilar Ponte e desenvolverase entre o 11 de xaneiro e o 27 de febreiro, ao longo de 33 sesións nas que se aplicará unha metodoloxía que abordará os contidos de forma teórica, dando paso a dinámicas grupais de traballo participativo.