O POL entra en Asturias e deixa en Trabada fora de ordenación 30 edificacións pegadas ao río Eo, asegura o BNG

Nota de Prensa

A Xunta ordena solo mediante o Plan de Ordenación do Litoral en territorio da Comunidade asturiana

A zona clasificada correspóndese coa franxa do concello de A Veiga onde entra a ordenar 20has. de solo

En Trabada deixa fora de ordenación 30 edificacións pegadas ao río Eo

Os nacionalistas cualificaron de disparate e chapuza sen precedentes as directrices fixadas polo Plan de Ordenación do Litoral, tanto xenericamente como particularmente no caso do concello de Trabada, separado polo río Eo do veciño concello de A Veiga na CC.AA  de Asturias, onde o POL entra a clasificar solo sen ter competencias nunha superficie aproximada de 20 has. Para o BNG este e un mais dos exemplos polos que demandan a retirada do POL e unha nova redacción, que atenda as singularidades e realidades existentes nos núcleos de poboación costeiros de Galiza mediante un documento serio e rigoroso e non unha sucesión de incorreccións de difícil comprensión como a que vimos de referir.

Os nacionalistas organizaron o pasado venres un acto na Ría de Abres por tratarse do núcleo de Trabada máis afectado por este Plano urbanístico que afecta no total do Concello 199,19 hectáreas das que 86,67 se sitúan por riba da franxa dos 500 metros de costa e que se corresponden co que o documento define como áreas de xestión. O BNG afirmou que considera un auténtico despropósito as propostas e solucións que o Plano de Ordenación Litoral establece para o Concello de Trabada, na medida que significa unha hipoteca para o desenvolvemento urbanístico do Concello e impide unha ordenación territorial que faga posíbel un crecemento sustentábel coas potencialidades de futuro que se lle poidan presentar a Trabada.

Os nacionalistas informaron que 82,50 hectáreas se corresponden coa zona de protección, 12,76 coa zona de mellora ambiental e paisaxística e 104,93 coa zona de ordenación. A área de ordenación correspóndelle ao Concello determinar os usos, na área de mellora ambiental e paisaxística farana o Concello de acordo coa Xunta e na área de protección, quen determina os usos é o Goberno galego, non permitindo ningún uso de tipo residencial. Na mesma liña, continuaron os nacionalistas hai que recordar que área de protección divídese entre o de protección ambiental(costa) e protección de corredor(rios) que en Trabada representan en cada caso  72,46 hectáreas e 9,03  hectáreas respectivamente, polo que a maiores dos núcleos costeiros da Ría de Abres , tamén se prohiben usos residenciais en Vilafernando. Neste sentido queren denunciar que incluso deixan fora de ordenación unha nave industrial no empalme de Vilafernando.

O BNG de Trabada denunciou que o Plano establece usos do solo sen atender a criterios regrados, na máis absoluta discrecionalidade, plantexando solución distintas para realidades que son iguais, criando inseguridade xurídica e abre a porta ao urbanismo a carta. O PP tenlle que explicar varias cousas aos veciños de Trabada , empezando por recoñecer as súas mentiras da campaña electoral, pois está a prohibir usos residenciais por riba dos 500 metros, e a seguir por responder por que entra a saco na capacidade de planificación dos Concellos, por contestar por que o nivel de protección en Trabada acada este grao. Neste sentido consideran como un disparate que a área de xestión do Plano chegue a pobos como Vilafernando  ou Leirado que se sitúan a máis de un Kilometro da delimitación de Costas.

Asemade o BNG considerou particularmente grave que o Plano veña a prohibir usos residenciais en varios solos que teñen a consideración de urbanos no Planeamento en vigor en Trabada como acontece no lugar da Alameda ou Pedrido na Ría de Abres. Nesta liña os nacionalistas queren advertir que o Plano de Ordenación do litoral deixa fora de ordenación a totalidade das edificacións existentes na Ría de Abres a unha beira e outra da N-640, o que significa a efectos prácticos que o seu valor catastral pasa a ser cero e que nesas vivendas só se poderán facer obras de conservación, nunca obra nova. Nesta dirección hai que ter en conta que se prohibe tamén calquera uso residencial nos terreos existentes á beira da estrada xeral na Ría de abres o que crea un prexuízo importante para este núcleo.

Os nacionalistas informaron que este documento vai determinar calquera Plan Xeral futuro de Trabada posto que as súas disposicións, teñen que axustase ao POL polo seu carácter supramunicipal, e como é obvio as consideracións dos dous documentos entran en contradición.Asemade tamén hai que ter en conta a resposabilidade municipal a hora de non ter adaptado o planeamento a lexislación provoca unha maior indefensión para o noso Concello, na medida en que pode darse o paradoxo que se clasifique como solo de protección, solo que na súa realidade fáctica teña mesmamente a consideración de urbano consolidado.

Xa por último desde o BNG de Trabada solicitan ao Concello a que presente as suxestións pertinentes ao documento da Xunta, prazo que a Consellaría ven de ampliar até o dous de Maio, a fin de salvar diversas zonas do Concello que ao que as que vimos de citar fican absolutamente hipotecadas. Asemade os nacionalistas póñense a disposición dos veciños de Trabada que queiran coñecer como quedan as súas vivendas e as súas parcelas a fin de darlle a información oportuna.