Campaña #PintoUnCorazónVerde en defensa dos servizos públicos

A Mariña, 6 de maio, 2020. O Plan de Choque Social Galiza é unha iniciativa que agrupa a case un centenar de colectivos galegos de ámbitos moi diversos, sociais, feministas, ecoloxistas e sindicais coa fin de deseñar e implementar un plan de choque que recupere e mellore as condicións de vida de toda a xente e en especial das persoas que antes da pandemia do Covid19 loitaban por sobrevivir e que agora son as máis desprotexidas.

#PintoUnCorazónVerde

Unha onda cidadá de corazóns verdes esixe reforzar a sanidade pública, as residencias e servizos sociais para saír da crise

Como resposta á crise sanitaria e social que estamos a atravesar, a plataforma # PlanDeChoqueSocial, da que forman parte máis de 400 organizacións sociais e ambientais, impulsa a campaña ‘Pinto un corazón verde’ para reivindicar uns servizos 100 % públicos, universais e de calidade. Decenas de personalidades da cultura, a música e a comunicación, así como profesionais dos servizos esenciais, sumáronse á campaña #PintoUnCorazónVerde e animan á poboación para colgar un corazón verde nos seus balcóns, xanelas, centros de traballo, hospitais, escolas ou medios de transporte. A campaña esixe que se revertan os recortes e as privatizacións que nos últimos anos de austeridade colocaron a España moi por baixo da media da UE en gasto social e por tanto nunha situación máis vulnerable ante a crise. Galiza leva anos sufrindo políticas de recorte de servizos públicos, como por exemplo na sanidade ou nas residencias de maiores, sectores nos que se deixaron sentir con forza as nefastas consecuencias de décdas de privatización e precarización.

“Os servizos públicos están ao noso lado desde que nacemos e acompáñannos en toda a nosa vida. Garanten dereitos fundamentais como a educación, a saúde ou a protección social. Por iso, cando recortan servizos públicos, recortan as nosas vidas, a nosa dignidade”. Así comeza o manifesto da campaña cidadá ‘Pinto un corazón verde’, coa que centos organizacións sociais, profesionais dos servizos esenciais e rostros coñecidos convidan á poboación para esixir uns servizos 100% públicos, universais e de calidade pintando un corazón verde nas súas xanelas.

A campaña #PintoUnCorazónVerde quere denunciar que a crise sanitaria e social provocada pola enfermidade COVID19 evidenciou que os recortes e privatizacións dos servizos públicos experimentados nos últimos anos, teñen consecuencias devastadoras. España está por baixo da media da UE en gasto sanitario (-1,1 %), educativo (-0,7 %), de protección social (-1 %), ou de vivenda (-0,1 %) e outros gastos necesarios, como os da loita contra a violencia machista ou a pobreza infantil, seguen estando lonxe do necesario para abordar estes problemas. No caso de Galiza, atopámonos con que a sanidade galega está á cola do Estado en camas de hospital por habitante, que o orzamento saniatario se reduxo un 18% desde 2018 e o persoal en 1.100 sanitarios menos.

A infradotación non só en hospitais, tamén de residencias de maiores, axudas á dependencia ou a precariedade dos servizos sociais han dificultado a actuación ante unha emerxencia xa non só sanitaria, senón social e alimentaria. Por iso desde a campaña denúnciase que os profesionais traballaron cunha falta de seguridade absoluta. “A pandemia está a ser especialmente crúa nas residencias de maiores, un sector altamente privatizado (en torno ao 85 % son residencias privadas, algunhas en mans de fondos de investimento) no que leva anos denunciando o mal estado das instalacións e a situación do persoal, escaso, saturado e mal remunerado. De feito, a Fiscalía investiga a 38 residencias de España, 19 delas en Madrid, onde se produciu a maior mortaldade (en torno ao 70 % das mortes por COVID-19 da rexión)” citan.

Para a plataforma cidadá #PlanDeChoqueSocial, composta por máis de 400 organizacións e colectivos sociais ao longo do estado español, é o momento de apostar “por un futuro que cambie o presente, e por un futuro para as nosas vidas con dignidade para todas as persoas”. Trátase, afirman, de poder afrontar esta pandemia e as futuras que poidan chegar, da mellor das maneiras. Tamén se trata “de non deixar a ninguén atrás” nesta crise social e económica que acaba de empezar.

Apoio de rostros famosos e sectores esenciais

No seu lanzamento a campaña #PintoUnCorazónVerde recibiu o apoio de máis dunha vintena de persoas representativas do mundo da cultura, a comunicación e a música. Ana Pardo, Antonio da Torre, Aitana Sánchez Xixón, Cristna Fallarás, Natalie Pozas, Sergio Peris, Juan Diego Botto, Carlos Bardem, Fernando Tejero, Alberto San Juan, Bob Pop, Olga Rodríguez, Rozalen, Amparo Sánchez ou Nacho Veigas son algúns dos nomes que se sumaron a pintar un corazón verde polos servizos 100% públicos.

Así mesmo, traballadoras e traballadores dos denominados sectores esenciais quixeron sumarse á convocatoria. Persoal sanitario, de limpeza, de transporte, servizos sociais ou de residencias de maiores son algúns dos rostros que se participaron. Tamén agricultoras, agricultores, gandeiros, transportistas e persoal do pequeno comercio alimentario. Todas estas persoas son quen, segundo a plataforma #PlanDeChoqueSocial viven no seu propio traballo diario a precarización dos servizos esenciais.

As entidades sociais desta rede convidan á cidadanía para colgar, a partir de hoxe, un corazón verde nos seus balcóns, xanelas, centros de traballo, hospitais, centros de saúde, despensas ou bancos de alimentos, colexios… facerse un vídeo ou unha foto e utilizar o HT #PintoUnCorazónVerde. Sexan famosas ou anónimas, as centos de persoas que impulsan esta campaña coinciden en que “desta crise só podemos saír se reforzamos os servizos públicos, universais e de calidade, sen privatizacións. Non queremos recortes nunca máis”. Estamos ante unha crise sanitaria sen precedentes, pero tamén ante unha crise social e económica de enormes dimensións. Para afrontar o devandita crise esixen a Goberno central e a todas as administracións que se reforcen os servizos públicos que nos últimos anos víronse precarizados e que se revertan os procesos de recortes e privatización que sufriron.