Tal día coma hoxe, un 18 de agosto de 1990, celebrábase a VI Feira do Bonito de Burela, organizada pola Sociedade Cultural LEDICIA. Unha festa que como tal botara a andar o 27 de agosto de 1983, celebrándose nos seus inicios na espazo comprendido entre a actual Travesía do Porto, as chabolas e Leandro Cucurny.
É ben certo que todas as edicións da Feira do Bonito teñen o seu interese e tamén anécdotas. A de 1999 por ter acadado a declaración de Festa Galega de Interese Turístico, ou a de 2019 pola declaración de Fiesta de Interés Turístico Nacional; outras por ter chovido dabondo, ou pola relevancia dos seus pregoeiros.
Se a edición de 1989, a quinta, a Feira se tiña celebrado no espazo onde se ubican a Praza da Mariña e a Casa da Cultura (en tempos ocupado polo serradoiro de Arcadio Pardiñas), en 1990 volveu facerse a carón das chabolas. E por suposto a edición daquel 1990 aporta datos para a historia da feira ou cando menos para o anecdotario.
Pero antes, lembrar que naquel 1990 no porto de Burela había un total de 194 embarcacións con 1.454 tripulantes; no conxunto do ano, subastáranse 12.308.458 kilos de peixe (aproximadamente a cuarta parte, bonito), que reportaran 3.834.685.979 ptas (algo máis de 23M€, dos que a cuarta parte corresponderan ao bonito, bonito que se vendera a un prezo medio de 284 ptas, 1’71€), segundo recolle Ricardo Pena Domínguez no seu libro “Burela. Apuntes históricos”.
Centrándonos na Feira do Bonito de 1990, o primeiro dato que aporta tén que ver coa fixación da data de celebración. Se a primeira edición fora o 27 de agosto de 1983; a segunda, o 4 de agosto de 1984; a cuarta, o 29 de outubro de 1988; e a quinta o 26 de agosto de 1989, aquela VI edición foi a derradeira que tivo lugar a mediados de agosto, xa que ao ano seguinte, 1991, salta ao primeiro sábado do mes, día 3. O ano 1992 foi un ano de aparentes dúbidas ao respecto da fixación da data, xa que a Feira celebrouse o segundo sábado, o día 8. As dúbidas quedaron definitivamente aparcadas na novena edición, a de 1993: foi o día 7, primeiro sábado de agosto. E dende aquela, ata hoxe.
Pero a VI Feira do Bonito de 1990, ademais desa connotación temporal, aporta un segundo dato que tén que ver coa súa promoción. Sabido é que dende hai anos, e non dende onte, os medios de comunicación prestan atención a cada edición da Feira do Bonito: periódicos e radios, sobre de todo, e algunha canle de televisión van anticipando aspectos do evento e mesmo realizan suplementos ou programas especiais adicados á Feira. O traballo feito polos medios de comunicación, coa colaboración e ás veces co impulso de administracións e entidades privadas, tén sido, e segue a ser, a mellor canle de promoción da Feira, sen dúbida; sen esquecer a excelente valoración que fixo e fai o público asistente.
Pois ben, co obxectivo de dar a coñecer Burela, o bonito e a propia Feira, na edición da Feira do Bonito de 1990 realizouse o primeiro programa de radio adicado na súa integridade á mesma. É máis, o programa foi feito en directo dende o propio evento, cando este comezaba a bulir, entre as sete e as oito e media da tarde. Durante o programa, que contara co patrocinio de catro ou cinco empresas de Burela con relación co mar, e co da propia Confraría de Pescadores, houbera varias entrevistas, todas en directo agás dúas ou tres pregrabadas. Así, polo programa pasaran, entre outros, o por aquela alcalde de Cervo, Roberto Alvarez; o Patrón Maior da Confraría de Burela, Benigno Beltrán, ou o daquela presidente de Ledicia, Ángel Rodríguez.
Un programa de radio feito cos elementos técnicos de hai trinta anos, nada que ver cos da actualidade. Pero o equipo que dirixía o xa desaparecido Marcial González Vigo fixo posible que fora emitido para toda a provincia, e ata onde abarcaba a cobertura, pola FM da cadena COPE. Naquel equipo estaban María José Fernández Azpeitia na locución, e Chema Núñez Losada na parte técnica (e un servidor facendo algo de locución e producción).
Outros dous datos máis sobre a Feira: o mindoniense Xosé Vizoso era o autor do cartel anunciador, que por outra parte patrocinaba por primeiro ano a Deputación Provincial.
PD.- Serva este artigo como agradecemento a LEDICIA e a toda a xente voluntaria que ten colaborado dende 1983 para escribir a longa historia da Feira do Bonito, na seguridade de que a Feira volverá con máis forza en 2021.
CHEMA GONZÁLEZ BARCIA. Exalcalde de Burela.
Evaristo Calvo, Rebeca Montero e Vítor Mosqueira interpretaron o pasaxe que recrea os últimos momentos do Mariscal Pardo de Cela e da súa muller, Isabel de Castro, antes da traizón da Frouseira. A acción cultural, coordinada por Carme Varela e promovida pola Vicepresidencia da Deputación de Lugo, rende homenaxe ao gran dramaturgo do Valadouro no seu primeiro cabodano. 
Estiveron acompañados polas dúas técnicas de Xuventude, para gozar dunha mañá nas distintas actividades que ofrece este parque de trampolíns. Pola tarde, o grupo parou a xantar no Lago das Pontes, onde puido coñecer a historia da súa creación e desfrutar dun baño. A viaxe estivo organizada polas Concellerías de Xuventude e Deporte e pola Oficina de Información Xuvenil dentro do programa “Verán a Tope en Xove 2026”.
O 112 Galicia tivo constancia do accidente arredor das 13:20 horas deste martes. Segundo varios particulares, dous turismos colidiran no quilómetro 79 da LU-862. Nun vehículo había un ferido, mentres que no outro unha persoa estaba atrapada, aínda que se atopaba en bo estado trala colisión. Desde o CIAE 112 Galicia informouse ao Servizo de Urxencias Sanitarias de Galicia-061, aos Bombeiros de Viveiro, á Garda Civil de Tráfico e á Agrupación de Voluntarios de Protección Civil do Vicedo. Unha vez no punto, a dotación de bombeiros puido liberar á persoa atrapada.
A Orquesta Mondragón con Javier Gurruchaga á cabeza e Fórmula V con Paco Pastor encheron de lembranzas e de ritmo a noite ribadense. Desde o Concello fan un balance moi positivo do concerto "xa que contribuíu á dinamización económica da nosa vila".
O Campo de Fútbol de As Valgas acolleu as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que pechou unha noite inesquecible.
Alí salientou o papel que desenvolve este evento no impulso dos produtos agroalimentarios de proximidade, ao tempo que favorece as canles curtas de comercialización. Destacou tamén a importancia deste mercado, considerado como un dos máis antigos da provincia de Lugo, xa que ofrece unha ampla mostra dos principais oficios de artesáns da Idade Media. Ademais, permite aos asistentes gozar de actividades variadas e degustar produtos agroalimentarios diversos.
A institución provincial colabora con ambas citas, organizadas pola Asociación Cultural Amigos da Liga Santaballesa, cunha achega económica de 4.000€. García Porto recalcou que “estes eventos son un exemplo de como a historia da emigración pode converterse nun atractivo turístico de calidade, capaz de atraer visitantes e de reforzar o orgullo de pertenza da veciñanza”.
