As XXVIII Xornadas Técnicas poderanse seguir en directo presencialmente desde a confraría de pescadores de Burela e a través de diferentes plataformas en internet

Burela, 18 de maio, 2021. As Xornadas Técnicas de Expomar deste ano, malia as limitacións impostas pola situación sanitaria da Covid19, vanse converter nas máis abertas da súa historia, posto que a Fundación Expomar ofrece múltiples posibilidades para seguilas en directo.
Para a posta en escea da xornada empregarase a plataforma zoom, polo que as persoas interesadas en interactuar cos ponentes deben rexistrarse previamente desde a páxina www.expomar.com. As diferentes ponencias tamén se poderán seguir en directo a través de youtube, con acceso directo desde a mesma páxina de Expomar.
O evento, que se celebra na mañá deste xoves baixo o título “2021: odisea na Pesca”, non só se poderá seguir a través de internet, senón que as persoas do sector pesqueiro tamén as poderán seguir presencialmente desde o salón de actos da confraría de pescadores de Burela, desde onde se emitirá a presentación da xornada e intervirá o moderador.
Rógase aos interesados chegar á sala con suficiente antelación, xa que o acceso tramitarase cun obrigado rexistro de asistentes e por suposto gardaranse tódalas medidas de seguridade marcadas polas autoridades sanitarias.
A intención da organización é que as xornadas poidan chegar fácilmente ao maior número de persoas posible, debido ao interese que desperta a temática deste ano nos diferentes ámbitos do sector pesqueiro.
As Xornadas Técnicas 2021 estarán moderadas de novo polo director de Abanca Mar, Javier Fraga, e contarán coa participación de Isabel Artime, directora xeral de pesca sostible do Ministerio de Agricultura, Pesca e Alimentación; Emilia Gargallo, de DG Mare da Comisión Europea; Javier Garat, secretario xeral de Cepesca e presidente de Europeche; e Rosa Quintana, conselleira do mar da Xunta de Galicia, que se encargará de clausurar esta edición.
Despois da presentación a cargo do presidente da Fundación Expomar e alcalde de Burela, Alfredo Llano, a directora xeral de Pesca Sostible do Ministerio de Agricultura, Pesca e Alimentación, Isabel Artime, abrirá a xornada co tema «Principais retos do sector pesqueiro español».
Representando á dirección xeral de asuntos marítimos e de pesca da Comisión Europea, Emilia Gargallo realizará a súa ponencia «Estratexia da granxa á mesa: que lle depara ao sector da pesca?».
E finalmente Javier Garat, secretario xeral da Conferedación Española de Pesca (Cepesca) e presidente da Asociación das Organizacións Nacionais de Empresas Pesqueiras da Unión Europea (Europêche) realizará unha «Análise da situación pesqueira» desde a perspectiva do sector empresarial.
En torno ás 13:30h a conselleira do mar da Xunta de Galicia, Rosa Quintana, encargarase da clausura das Xornadas Técnicas Expomar 2021.
O venres 21 pola mañá celebrarase o Encontro Empresarial de Organizacións Pesqueiras, que reunirá de maneira virtual ás principais entidades representativas da frota galega e do sector pesqueiro a nivel nacional.
Tanto as Xornadas Técnicas como o Encontro Empresarial están organizados pola Fundación EXPOMAR, en colaboración coa Deputación de Lugo e Afundación Obra Social Abanca, e financiadas polo GALP A Mariña Ortegal.