A Xunta e a CEL colaboran na posta en marcha de dous puntos de asesoramento a pemes en Ribadeo e Monforte

Lugo, 28 de marzo de 2022. O vicepresidente económico e conselleiro de Economía, Empresa e Innovación, Francisco Conde, participou esta mañá na presentación da iniciativa Conecta Lugo, que a Xunta desenvolve en colaboración coa Confederación de Empresarios desta provincia (CEL), e a través da que se abrirán dous puntos de información en Ribadeo e Monforte de Lemos para achegar asesoramento a un maior número de pemes.

Conde agradeceu á CEL a súa disposición a cooperar e insistiu na importancia da colaboración público-privada para impulsar a competitividade empresarial. Neste sentido, as novas oficinas ofrecerán axuda ás pemes, especialmente en todo o que atinxe á innovación, co foco posto naquelas con potencial pero que aínda non deron o paso. Tamén se desenvolverán actividades divulgativas, visitas a empresas e foros sectoriais para difundir entre o tecido empresarial da provincia a cultura da innovación, os apoios dispoñibles e a importancia de emprender este camiño.

O vicepresidente económico lembrou o programa de impulso á innovación das pemes, no que a Xunta está investindo 12M€ e que ten como obxectivo chegar a 15.000 empresas especialmente de núcleos non urbanos. Tamén avanzou a convocatoria dos préstamos IFI Innova, que se publica hoxe no Diario Oficial de Galicia (DOG). Cun orzamento de 2,5M€ pon a disposición das pemes galegas axudas de ata 500.000 euros a un prazo máximo de 12 anos con catro de carencia. A previsión é mobilizar 4M€.

Conde tamén se referiu ao momento económico actual no que a recuperación se está vendo condicionada polo encarecemento progresivo da enerxía, a transición enerxética desordenada e inxusta do Goberno central, a inflación e a crise de subministracións agravada polo paro no transporte. Incidiu no compromiso da Xunta co tecido empresarial e enumerou as medidas que o Goberno galego está poñendo en marcha para paliar a situación, como a liña de avais para pemes e un programa de préstamos directos que mobilizarán 140M€; a convocatoria de 128M€ en programas de aforro enerxético para familias e empresas -entre os que destacan o Bono Enerxía Peme ou a ampliación do Renove Automoción-; así como medidas específicas para sectores estratéxicos como o mar e o agropecuario.