A porteira brasileira de 23 anos fichou polo club en agosto, sendo cedida por entonces ao Viaxes Amarelle e, finalmente, reincorpórase ao club tras a marcha da nosa Lendaria Jozi
Burela, 18 de xaneiro. Ana Eliza Ribeiro de Oliveira (Ana Eliza), nada en Passa-Qatro (Minas Gerais, Brasil) no ano 2000, reincorpórase a o equipo feminino do Pescados Rubén Burela FS na metade desta tempada 23/24, despois de xogar durante a primeira volta no Viaxes Amarelle cedida polo noso club. A porteira brasileira será a nova compañeira de Caridad baixo os paus tras a triste marcha da nosa lendaria porteira, Jozi Oliveira a terras itálicas.
Procedente do AD Sala Zaragoza, no que xogou durante a tempada 22/23, Ana Eliza dá os seus primeiros pasos no fútbol sala participando eventualmente en torneos co equipo da súa terra natal, o Passa Quatro MG, desde 2014 a 2019. Neste último ano ficha polo Caxambu MG durante unha tempada, pasando ao Américo Brasiliense SP no que xoga na tempada 20/21 e que será a última en Brasil. Na 21/22 comeza a súa carreira na liga española fichando polo Joventut D’Elx durante outro ano, ata a pasada tempada. Unha xogadora nova, moi traballadora, que confiamos encaixará ben e dará frescura á nosa plantilla.
Ana Eliza volve a Burela ilusionada e con moitas ganas de aprender, “É un club onde todas queren estar, porque é onde se atopan as mellores xogadoras e profesionais. Cando empecei a xogar a fútbol sala vía os partidos de Primeira División española desde Brasil e soñaba con xogar neste equipo. Para min foi sempre un referente no futsal feminino”. Sobre o que espera achegar ao equipo, “Eu creo que podo achegar a miña gran ilusión por mellorar deportivamente como xogadora profesional, as miñas ganas por traballar todos os días para alcanzar grandes metas deportivas xunto ao Burela FS” e sobre o que espera aprender nel, “Estou completamente segura de que aprenderei de todas e cada unha das grandes profesionais que xogan neste club”. Os seus obxectivos para o que queda de tempada no equipo “Os meus obxectivos para o resto da tempada son estar ao meu máximo nivel para poder xogar e axudar ao equipo para gañar todos os títulos posibles”. Por último, unha mensaxe á afección, “Vou tentar devolver o agarimo co que me acolleron neste precioso lugar, que me lembra a Minas, cos maiores éxitos posibles para a afección”.
Manuel Blanco, presidente do club, confía na nova fichaxe, “Estaba cedida no Viaxes Amarelle, pero ao ser nosa e irse Jozi reincorporámola ao club. Porteira nova, de 23 anos, con proxección, na liña que estamos seguindo este ano, e que vai compartir a portería con Caridad e loitar por eses minutos de xogo que non son fáciles de conseguir no noso equipo debido á calidade das xogadoras. É importante manter alto o nivel das/os nosas/os porteiras e porteiros, un elemento crave do xogo. É unha aposta que xa levamos meses seguindo e agora vai ter a oportunidade de poder xogar neste equipo e de aprender das nosas xogadoras, especialmente de Caridad. O importante é o traballo, xa o sabe porque xa estivo connosco ao principio do verán esta pretempada e é o plantexamento base que hai que seguir aquí, traballo, traballo e traballo. Comezará ademais coa oportunidade de poder gañar un título, a Supercopa, que se celebrará dentro de dúas fin de semana en Torremolinos, e que esperamos poder traer a Burela, polo menos, dalo todo por iso. Sería unha boa estrea no equipo”
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
