“O PP volve á irresponsabilidade cos intereses dos traballadores de Alcoa”, afirma o PSdeG

A Mariña, 19 de maio, 2025. Ante as declaracións efectuadas durante as últimas semanas por dirixentes, deputados e senadores do PP, Patricia Otero e César Mogo, deputada no congreso e senador, respectivamente, apuntan ao respecto:

“Ao PP esixímoslle responsabilidade e lealdade. Esa é a súa obriga”.

“Responsabilidade cos traballadores e traballadoras de Alcoa na planta de San Cibrao”.

“Non se pode intentar sacar tallada política, en contra do manifestado polo propio Comité de Empresa, alimentando versións sobre as consecuencias do acontecido o pasado 28 de abril, que nada teñen que ver cos intereses dos traballadores”.

“O único que conseguen é xerar incertezas e esixir responsabilidades fora de lugar que non favorecen en nada aos empregados das plantas de Alcoa”.

“Os traballadores non son mercadoría electoral. O PP non pode traballar coa súa irresponsabilidade en contra dos intereses dos traballadores e traballadoras de Alcoa”.

Lealdade cos gobernos e coa Comarca da Mariña

“A Xunta de Galicia ten dado, fai uns meses, un paso adiante asinando un memorándum e poñendo fin así a unha etapa, onde no caso de Alcoa só lle movían intereses partidistas”.

“Pedímoslle ao PP que non regrese ao pasado, que teña altura de miras e que non volvan a impoñerse os que só saben atizar o lume, que lamentablemente na dereita lucense son moitos”.

“O que necesitamos é encauzar a solución que xa está en marcha, que é a verdadeira solución para un futuro de estabilidade no eido do emprego e da estabilidade industrial”.

“Todo o demáis, sobra. E dende logo, sobra a frivolidade coa que os dirixentes do PP se teñen manifestado nos últimos días”, conclúen xs socialistas.