O BNG acusa ao goberno de Xove de excluír á oposición na visita da Conselleira

Xove, 30 de abril, 2026. O BNG de Xove informou hoxe de que tivo constancia, a través das redes sociais do Concello, da visita da Conselleira de Economía e Industria, María Jesús Lorenzana, quen mantivo unha xuntanza co alcalde, membros do grupo de goberno, o xerente de Xestur e parte do empresariado local no Salón de Plenos.

A voceira municipal do BNG, Pilar Vázquez, sinalou que, “considerando que se trata dunha boa nova para o concello, o mínimo sería contar coa corporación municipal ao completo, tal e como se afirma nas redes sociais”. Engadiu que “parece que se esquece que a corporación está formada por tres grupos políticos e non só por un”. Segundo explicou, nin o BNG nin o PSOE foron convidados nin informados sobre a visita da Conselleira ao Salón de Plenos nin sobre a suposta reunión da “corporación” co empresariado xovense.

Vázquez cualificou esta situación como “deslealdade institucional” e lembrou que “non é un feito illado”. Indicou tamén que, se algo así o fixese unha alcaldesa do BNG ou do PSOE, “sería duramente criticado”. A voceira destacou que o BNG representa 650 veciñas e veciños de Xove, mentres que o PSOE representa 227, polo que a oposición suma o 41% da veciñanza. “Ese 41% non se ve reflectido nin identificado neste tipo de actos nin na comunicación institucional do Concello”, afirmou.

Promesas electorais

Durante a visita, a Conselleira anunciou a ampliación do Polígono Industrial de Camba, unha demanda histórica do tecido empresarial de Xove. O BNG celebrou o anuncio e expresou o seu desexo de que repercuta positivamente na economía local. Con todo, Vázquez apuntou que “non deixa de ser curioso que este tipo de anuncios se repitan sempre en anos electorais ou nos meses previos ás eleccións municipais”. Concluíu sinalando que “é de agradecer que a Xunta por fin se acorde de Xove e que isto sirva tamén para desbloquear o investimento no ansiado proxecto da auga”.