O GALP A Mariña-Ortegal convidou a pediatra de atención primaria Consuelo Lobelle Fernández a impartir as xornadas técnicas Pesca Saúde, este martes 12 de maio na Casa do Concello de Burela. A doutora centrou a súa intervención en sinalar os beneficios do consumo de produto pesqueiro no desenvolvemento cognitivo e no crecemento da infancia
Burela, 13 de maio, 2026. Consuelo Lobelle participou nas Xornadas “Pesca Saúde” cunha intervención titulada “O que pos hoxe no seu prato, mañá constrúe o seu futuro”, na que abordou a importancia do peixe na alimentación infantil, poñendo o foco na necesidade de dietas equilibradas e no impacto que isto pode ter no desenvolvemento físico e cognitivo.
Segundo a experta, o peixe non é un alimento «máxico», pero si unha parte chave dentro dunha dieta saudable que aporta nutrientes fundamentais como proteínas de alta calidade, graxas omega-3, iodo, vitamina D, B12 e selenio. Explicou tamén a diferencia entre os diferentes tipos de graxa que aportan os alimentos e alertou sobre os perigos dos alimentos precociñados e ultraprocesados que ofrece a industria alimentaria, que inclúen graxas trans, moito máis perxudiciais mesmo que as saturadas. O peixe, pola súa banda, aporta graxas poliinsaturadas como as omega-3, que definiu como o «combustible do cerebro», sendo especialmente necesarias nas fases de crecemento de nenos e nenas.
Recomendacións, consellos e trucos.
Lobelle sinalou que, para unha persoa en crecemento, a cantidade recomendada de racións de peixe semanal é de mínimo dúas, e idealmente 3 ou 4, considerando que unha ración debe levar 70 gramos de produto pesqueiro. Avisou sobre a conveniencia de evitar, antes dos 10 anos, o consumo de dalgunhas especies como o peixe espada ou o atún vermello e limitar a dose aos 120 gramos mensuais entre os 10 e os 14 anos.
A pediatra advertiu, en calquera caso, de non «obsesionarse coa gramaxe exacta», e atender máis á regularidade no consumo e a variedade entre especies (por exemplo, entre peixe branco e azul). E tamén aportou trucos para conseguir limitar as barreiras habituais que poñen os nenos diante deste tipo de produto, como introducilo na dieta canto antes para que se acostumen ao sabor, aproveitar os momentos nos que manifesten ter fame e mesturalo con outros alimentos que lles gusten en elaboracións variadas.
Diante doutros condicionantes como o prezo ou a dificultade para cociñar o produto pesqueiro, a experta lembrou que acostumar os nenos e nenas a consumir peixe e outras especies do mar é un investimento no seu benestar futuro.
Sobre as Xornadas “Pesca Saúde”
As xornadas, nas que tamén participou a alcaldesa de Burela, María del Carmen López Moreno, foron introducidas por Rosa Ana González Vizoso, xerente do GALP A A Mariña- Ortegal, que promove Pesca Saúde, e que deu paso a un vídeo divulgativo de presentación da campaña que se pode consultar tamén na web do proxecto, pescasaude.gal.
As Xornadas “Pesca Saúde” contan con profesionais sanitarios de diversas especialidades para desmontar mitos e promover o consumo de peixe e marisco de proximidade de maneira clara e rigorosa, dende a evidencia científica.
Próximas actividades e incentivos ao consumo
Con esta xornada deuse continuidade ás actividades que baixo o lema “Alimentos do mar, alimentos do vida”, tiveron lugar no mes de abril en varios centros de saúde situados no territorio do GALP A Mariña-Ortegal. Nestes eventos instaláronse puntos informativos e de reparto de materiais divulgativos, así como de vales de desconto de 5€ para trocar en peixerías adheridas á campaña.
Ademais, ata o 30 de xuño, as persoas que reúnan tiques de compra nestes establecementos por un valor igual ou superior a 60€ poderán participar no sorteo dunha degustación para dúas persoas nun establecemento de hostalaría local.
Contexto do proxecto
O proxecto Pesca Saúde nace nun contexto no que o consumo de peixe fresco descendeu progresivamente nas últimas décadas, mentres aumentou a presenza de produtos ultraprocesados na alimentación habitual. Esta transformación dos patróns dietéticos está asociada a un incremento das enfermidades cardiovasculares, metabólicas e inflamatorias.
Pesca Saúde é máis que un proxecto alimentario: é unha aposta pola saúde, pola cultura mariñeira e polo futuro das nosas vilas costeiras. Comer peixe das nosas costas é coidar do noso corpo, do noso territorio e do noso mar. Nese sentido, na campaña ponse o foco na importancia de consumir produto fresco, mercado en establecementos de proximidade, así como o seu consumo na hostalaría local.
A iniciativa está financiada polo Fondo Europeo Marítimo, de Pesca e de Acuicultura (FEMPA) a través da Consellería do Mar. Nela participan sete GALP (Ría de Vigo-A Guarda, Ría de Pontevedra, Ría de Arousa, Costa da Morte, Golfo Ártabro Sur e A Mariña-Ortegal), baixo a coordinación do GALP Costa Sostible e coa colaboración da Consellería de Sanidade.
Con este xesto simbólico, expresou a súa solidariedade co pobo venezolano, trasladando o seu apoio ás familias das persoas falecidas, feridas e afectadas por unha traxedia que continúa deixando un elevado número de vítimas e miles de damnificados.
Por este motivo, o Concello recomenda ás persoas, colectivos e entidades que precisen facer uso dalgunha instalación municipal ou solicitar material que presenten as súas peticións coa antelación necesaria. A medida permitirá organizar adecuadamente a atención das solicitudes e a planificación dos recursos municipais.
Ao acto, que tivo lugar diante da sede da institución provincial, asistiron deputados e deputadas, membros da corporación provincial e empregados públicos, que gardaron un minuto de silencio como mostra de respecto e solidariedade coas persoas afectadas pola catástrofe. A Deputación quixo así unirse ao chamamento realizado pola FEMP en toda a España, expresando o seu apoio ao pobo venezolano nestes momentos de especial dificultade.
A alcaldesa, Dolores García Caramés, visitouna no seu domicilio para felicitala e entregarlle un ramo de flores en nome de toda a veciñanza. Nada en Sargadelos e veciña de Cervo, foi a máis nova de dez irmáns e desde moi nova traballou no campo e coidou dos animais, sempre cun gran espírito de esforzo. Nai, avoa e bisavoa, a súa familia destaca a súa alegría, enerxía e bo humor. Moi activa ao longo da súa vida, gozaba de viaxar, da praia, de conducir e de participar nas actividades municipais, ademais de cultivar a súa paixón por cantar. Coqueta, sorrinte e cun espírito novo, Benedicta é hoxe un exemplo de vitalidade para todo o municipio.
O Pazo de San Marcos acolleu a conferencia final, de Manuel Andrade Baliño, e a entrega de premios ás alumnas e alumnos que obtiveron mellores valoracións nas probas que realizaron, o xoves, individuais, na Facultade de Formación do Profesorado de Lugo, e o venres, por equipos, en Mondoñedo. A final do certame, cunha axenda complentaria que achegou ás rapazas e rapaces ao patrimonio e á cultura, celebrouse por primeira vez en Lugo da man da Asociación Galega de Profesorado de Matemáticas (Agapema) e coa colaboración da área de Cultura da Vicepresidencia da Deputación.
Dentro desta programación, o martes 30 de xuño ás 11:00 celebrarase na Casa da Cultura unha charla divulgativa impartida pola astrofísica Lucía González Cuesta, aberta a toda a veciñanza. A iniciativa enmárcase no programa provincial que busca ofrecer información rigorosa e garantir unha observación segura. Durante a xornada repartiranse folletos e gafas homologadas. A alcaldesa, Marta Rouco, destaca o carácter histórico do eclipse e anima a participar para vivilo con seguridade. O Concello lembra que só deben empregarse gafas específicas para mirar ao sol e continuará colaborando en actividades divulgativas e sociais arredor deste acontecemento único.
O obxectivo é facilitar que os mozos e mozas que o desexen poidan facer uso destas instalacións. A medida permitirá empregar o campo para a práctica deportiva e para a organización de partidos informais durante o período estival. Desde o Concello de Viveiro sublíñase a importancia de ofrecer espazos deportivos accesibles durante as vacacións de verán e de favorecer hábitos de lecer activo entre a mocidade.
