Mogo destaca que a A-8 no Fiouco “ten hoxe unha operatividade do 99,79% fronte ás 700 horas de peche anuais con gobernos do PP”

Madrid, 18 de maio, 2026. O senador socialista César Mogo acusou ao PP de cometer “tres torpezas en catro días” en relación coa A-8 ao seu paso polo Fiouco. “O venres en Vilalba confundiron a propiedade das casetas dos camiñeiros e esixiron ao Goberno o que é responsabilidade da Xunta; o domingo o senador Balseiro anunciou a defensa dunha moción nunha comisión que nin sequera se convocou; e o luns rexeitaron un acordo do Senado para axilizar a instalación dunha baliza láser no Fiouco. Non se pode meter a pata máis en menos tempo”, afirmou.

Mogo destacou que o Goberno de Pedro Sánchez converteu o tramo do Fiouco na zona máis monitorizada e sometida a controis de seguridade de todas as autovías españolas. Entre as actuacións realizadas desde 2018, citou:

12 novos carteis de alta reflectancia
58 sinais verticais
6 mangas de vento
3 novas estacións meteorolóxicas
Cámaras de vixilancia
Calizas intelixentes antinéboa que se activan ao paso dos vehículos
Rehabilitación estrutural do firme na N-634

O senador lembrou que “a situación era lamentable” durante os gobernos de Mariano Rajoy, cando “non se fixo nada fronte á persistencia da néboa” e cando se produciron “os accidentes máis graves”. Engadiu que o PP no Parlamento de Galicia “votou en contra de medidas inferiores ás que están instaladas hoxe”.

Segundo os datos que expuxo, a operatividade da A-8 no Fiouco é actualmente do 99,79%, con só 18 horas de corte no que vai de 2025, fronte ás arredor de 700 horas anuais de peche durante gobernos do PP.

Mogo cualificou de “pura demagoxia” a moción presentada polo PP no Senado e criticou que os populares rexeitasen unha proposta socialista para instar o Goberno a axilizar a instalación dun sistema de balizamento láser, que complementará o dispositivo xa existente.

“O PP segue instalado en xerar alarma, e iso é imperdoable porque xoga coa seguridade das persoas”, afirmou. Engadiu que o balizamento láser “é a última actuación dun proxecto que vela pola seguridade no Fiouco e instalarase o máis axiña posible”. Concluíu asegurando que “co PP non se fixo nada, e por iso agora recorren á manipulación e á mentira”.