O PSdeG leva ao Pleno da Deputación unha moción “para poñer fin á improvisación da Xunta nos servizos sociais”

A iniciativa tamén esixe transparencia sobre os recursos destinados á dependencia, máis apoio ao Servizo de Axuda no Fogar e unha planificación real de prazas residenciais

Lugo, 27 de xuño de 2026. O PSdeG defenderá no Pleno ordinario da Deputación de Lugo, que se celebrará este martes no Pazo de San Marcos, unha moción para esixir á Xunta de Galicia que poña fin á falta de planificación que leva anos lastrando o sistema público de servizos sociais e atención á dependencia. O Grupo Provincial Socialista considera que o Goberno galego non pode seguir afrontando un dos maiores retos sociais de Galicia sen unha estratexia definida, cun financiamento insuficiente e trasladando cada vez máis presión ás administracións locais.

A iniciativa socialista lembra que a Lei de Servizos Sociais de Galicia obriga á Xunta a elaborar un Plan Estratéxico que fixe prioridades, coordine recursos e adapte o sistema ás necesidades da cidadanía. Ademais, recalcan que “dezaoito anos despois da aprobación da norma, ese documento continúa sen existir”. Para o PSdeG, esta ausencia evidencia unha forma de gobernar baseada na improvisación, sen planificación e sen unha folla de ruta para responder ao envellecemento da poboación, ao aumento da dependencia e ás necesidades reais das persoas e das familias galegas.

O Grupo Provincial Socialista advirte tamén de que esta falta de planificación ten consecuencias directas sobre a calidade da atención. “Galicia figura entre as comunidades autónomas cun menor investimento por persoa potencialmente dependente, mentres centos de persoas continúan esperando por unha valoración ou por unha prestación á que teñen dereito. Ao mesmo tempo, os concellos seguen asumindo unha parte crecente da atención social de proximidade sen contar cun financiamento suficiente, especialmente no Servizo de Axuda no Fogar, un recurso esencial para que as persoas maiores poidan permanecer nos seus fogares con dignidade”, insisten os socialistas.

A moción reclama tamén transparencia. O PSdeG considera imprescindible que a Xunta faga público o destino dos recursos económicos que recibe o sistema de dependencia e detalle as achegas realizadas por cada administración entre os anos 2012 e 2025. O obxectivo é coñecer con rigor como se financia realmente o sistema e garantir que os fondos destinados á atención das persoas dependentes chegan aos servizos que precisa a cidadanía.

Ademais, a iniciativa insta ao Executivo autonómico a reforzar o financiamento do Servizo de Axuda no Fogar, simplificar os procedementos administrativos que soportan os concellos, mellorar as condicións laborais das profesionais do sector e desenvolver unha planificación real de prazas residenciais que permita reducir as listas de espera e ofrecer unha resposta acorde coa realidade demográfica de Galicia.

Con esta moción, o Grupo Provincial Socialista reclama á Xunta que cumpra as súas competencias e lidere unha política social baseada na planificación, na transparencia e no financiamento suficiente, para garantir unha atención pública de calidade ás persoas maiores, dependentes e ás súas familias.