O Festival de Cine Curto reúne oito curtametraxes en competición este venres en Ribadeo

Ribadeo, 5 de agosto de 2026. A Vicepresidencia da Deputación de Lugo apoia a quinta edición do Festival de Cine Curto de Ribadeo, que se celebrará desde mañá ata o sábado.

O certame, organizado pola asociación Areas Movedizas, reúne na sección competitiva oito curtametraxes de Galiza e Asturias, que se proxectarán o venres – 7 de agosto , ás 20.00 horas – no Cine de Ribadeo. Trátase de producións de diferentes temáticas e estilos, cun percorrido destacado noutros festivais estatais, que competirán polo Premio do Xurado Profesional e polo Premio do Público.

A deputada de Cultura Iria Castro amosou o seu apoio ás organizadoras do certame, valorando que “se consoliden iniciativas que inciden na distribución e na proxección da creación audiovisual propia”. A responsable provincial destacou que “ao longo de todo este ano, no que por primeira vez se celebraron en Lugo os Premios Mestre Mateo, vimos destacando a puxanza do audiovisual galego e lucense. Para que se sosteña, son necesarias propostas como esta, que acheguen as súas producións ao público, mais se falamos de curtametraxes, que non están presentes nos circuítos comerciais convencionais”.

O Festival inclúe nesta quinta edición unha xornada inaugural ao aire libre – 6 de agosto, ás 20.00 horas – no aprque de San Francisco, coa proxección das curtametraxes gañadoras das últimas catro edicions – “Una historia azul”, de Mónica Arnanz; “Nena”, de Xosé A. Touriñán e Jairo Iglesias; “Esto no es Noruega”, de Paco Cavero e Alicia Albares; e “Monstera”, de Diego R. Aballe – e un concerto de O Xoán, o proxecto musical do actor Xoán Fórneas, Premio Mestre Mateo pola interpretación de Castelao na tamén premiada “Antes de Nós”.

O intérprete chairego será ademais o padriño desta quinta edición do certame, que se clausurará o sábado – 8 de agosto, ás 20.00 horas – cunha gala final no Teatro de Ribadeo, con entrega de premios ás producións galardoadas e un concerto de bandas sonoras a cargo da Coral Polifónica de Ribadeo.