O PSOE de Viveiro denuncia un uso partidista dos vídeos institucionais do Concello

Viveiro, 15 de outubro, 2026. O Grupo Municipal Socialista de Viveiro denuncia o que considera unha utilización partidista dos recursos públicos por parte da alcaldesa. Segundo sinalan, o Concello está a elaborar vídeos institucionais financiados con cartos públicos nos que, afirman, se invisibiliza de maneira sistemática aos representantes da oposición, ao tempo que se inclúen declaracións e valoracións políticas da alcaldesa que, ao seu xuízo, son máis propias dun contido de propaganda partidista que dunha comunicación institucional.

O grupo socialista lembra que informar sobre a actividade municipal é unha responsabilidade pública, pero considera que aproveitar os medios institucionais para introducir mensaxes de carácter político supón un uso inadecuado dos recursos municipais.

Tamén subliñan que a veciñanza ten dereito a coñecer que nos actos oficiais non só participa o equipo de goberno, senón tamén os representantes da oposición, que forman parte da Corporación municipal e representan democraticamente unha parte relevante da cidadanía. Engaden que o feito de non aparecer nos vídeos oficiais non implica que non estean presentes, e que non se pode ofrecer unha imaxe institucional na que só exista o goberno municipal.

Do mesmo xeito, consideran inadmisible que as declaracións incluídas nos vídeos incorporen valoracións políticas que, ao seu entender, non teñen relación coa información institucional que debería transmitirse.

O PSOE de Viveiro afirma que, se a alcaldesa desexa realizar contidos de carácter político, dispón das canles do seu partido. O que cuestionan é o uso de recursos económicos municipais para elaborar materiais que, segundo indican, responden a intereses partidistas. Engaden que esta situación resulta especialmente preocupante en período electoral, no que a neutralidade institucional debe ser escrupulosa.

Por todo isto, o Grupo Municipal Socialista esixe transparencia sobre o custo destes vídeos, os criterios empregados na súa edición e o respecto á pluralidade política da Corporación municipal. Finalmente, lembran que o Concello non é patrimonio de ningún partido político, que os medios institucionais non son ferramentas de comunicación partidaria e que os recursos públicos non deben destinarse a propaganda.