A Deputación potencia a produción ecolóxica na provincia con accións formativas das que se benefician unhas 1.300 persoas
– O organismo lugués termina mañá un ciclo de xornadas sobre hortofruticultura sostible para profesionais e escolares, e en setembro arrancará o Plan Integral Agropecuario Forestal co fin de promover a creación de un mínimo de 15 empresas ecolóxicas
-A institución provincial impulsa tamén este sector, que conta con 163 produtores e factura 9 millóns de euros ó ano en Lugo, a través da súa plataforma de comercio electrónico e da marca Lugo Sabe, das que forman parte 6 firmas que comercializan produtos ecolóxicos
A Deputación de Lugo ten previstas ou en marcha accións formativas encamiñadas a potenciar a produción ecolóxica na provincia das que se beneficiarán unhas 1.300 persoas. O organismo provincial mantén unha aposta firme por este sector como unha oportunidade económica sólida para Lugo, tendo en conta a súa evolución nos últimos anos e o seu potencial de crecemento. De feito, Lugo, con 163 produtores -84 dedicados á produción animal e 79, á vexetal-, é a provincia galega cun maior volume de negocio neste sector, achegándose ós 9 millóns de euros ó ano, dos 21,89 facturados no conxunto de Galicia. En canto á superficie, Lugo é a segunda provincia, con 6.491,86 hectáreas. Esta actividade dá emprego a unhas 2.500 persoas na comunidade galega, na que o número de operadores pasou dos 11 rexistrados no ano 1997 ós 586 de 2011, o que supón un incremento de preto do 100%.
Consciente da capacidade deste sector para xerar riqueza e emprego no rural, fixar poboación e mesmo combater os incendios e a contaminación da auga, así como do apoio que necesita por parte das institucións -algo recoñecido polo propio Consello Regulador de Agricultura Ecolóxica (CRAEGA)-, a Deputación leva a cabo diversas estratexias en favor do desenvolvemento da produción ecolóxica e sostible, tales como un programa de xornadas en torno a hortofruticultura, dirixido a 400 profesionais e escolares, que conclúe mañá mércores na Fonsagrada; o Plan Integral Agropecuario Forestal, que formará a 900 persoas a partir de setembro; e a plataforma de comercio electrónico www.losproductosdelugo.com e a marca Lugo Sabe.
Técnicas ecolóxicas, de primeira man no Valadouro
As xornadas de hortofruticultura, que forman parte do proxecto de economía medioambiental Lug02, financiado ó 70% por fondos europeos, ten dous eixos: un para profesionais –agricultores e gandeiros- e outro para escolares. En canto ó primeiro, tras celebrarse catro sesións teóricas nos Concellos do Courel, A Fonsagrada, Vilalba e Cervantes, este martes tivo lugar no Valadouro unha última sesión, totalmente práctica, na que unha vintena de persoas coñeceron de primeira man nunha explotación ecolóxica as prácticas máis recentes que se están desenvolvendo en canto a produción sostible de produtos da horta e de froiteiras (plantación, abonado, poda, rega, recollida e conservación, entre outras), así como o aforro de recursos que supoñen e a calidade dos cultivos obtidos. As explicacións correron a cargo de Edmundo Maseda Maseda, un produtor valadourense que leva dez anos cultivando en réxime ecolóxico.
Polo que respecta ás xornadas especificamente dirixidas ós máis pequenos, consisten en actividades didácticas durante as que dous técnicos en hortofruticultura explican ós nenos de maneira sinxela e amena, e co apoio de material ilustrativo, a importancia de facer un bo uso dos recursos, sobre todo no referente á produción e consumo de produtos alimentarios. Os rapaces reciben ademais un DVD con contidos interactivos que lles permitirán coñecer a fondo as prácticas, características e beneficios da agricultura sostible. Estas xornadas xa tiveron lugar nos colexios San Xoán de Becerreá, Castroverde e Poeta Uxío Novoneira do Courel, e conclúen mañá mércores no CEIP Santa María da Fonsagrada.
Pola creación de empresas
Por outra banda, como estratexia de impulso á produción biolóxica, a Deputación arrancará en setembro o Plan Integral Agropecuario Forestal, unha ambiciosa iniciativa dotada con 1 millón de euros de orzamento que permitirá que 900 persoas reciban, de xeito gratuíto, formación principalmente práctica para a creación de novas empresas vinculadas á agricultura e á gandería ecolóxicas, así como ó aproveitamento forestal sostible. O proxecto, que forma parte tamén de Lug02, márcase como obxectivo a creación dun mínimo de 15 novas empresas.
A Deputación impulsa tamén o sector da produción ecolóxica a través da súa plataforma de comercio electrónico www.losproductosdelugo.com e da marca Lugo Sabe, dúas iniciativas impulsadas con fondos europeos co obxectivo de poñer en valor os produtos autóctonos e abrirlles novas canles de produción para mellorar a produtividade e competitividade das empresas lucenses. De ámbolos dous proxectos forman parte 6 firmas que comercializan produtos ecolóxicos: Caurelor, Terras de Líncora, Produtos da Ribeira Sacra, Galletas da Veiga, As Fadegas e Hortalizas Ecolóxicas María del Mar Maseda Iglesias.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
