A corporación de Lourenzá aprobara a actualización de ordenanzas fiscais tendo en conta IPC

O PLENO DA CORPORACIÓN MUNICIPAL TRATARÁ O VINDEIRO LUNS A MODIFICACIÓN DAS ORDENANZAS FISCAIS PARA 2013, QUE NA MAIORÍA DOS CASOS SERÁN ACTUALIZADAS TENDO EN CONTA A SUBA DO IPC INTERANUAL. AS TAXAS DO PUNTO DE INFORMACIÓN CATASTRAL E DAS ESCOLAS DEPORTIVAS NON SE CAMBIARÁN.

Lourenzá, 15 de novembro de 2012. A modificación das ordenanzas fiscais para o vindeiro ano 2013 someterase a aprobación no pleno da corporación municipal de Lourenzá que está convocado para o luns, día 19, ás doce e media do mediodía.

A alcaldesa, Emma Álvarez Chao, explicou que “manteremos os prezos do Punto de Información Catastral, os mesmos que ata o de agora, e para o resto das taxas actualizaremos o IPC tomando como referencia o do mes de agosto, que era un 2,7 por cento. Afectaríalle a tódalas taxas agás a das escolas deportivas, que de momento vaise manter como está na actualidade”.

En canto ás taxas de consumo de auga, Emma Álvarez comentou que “tal como nos recomendou a Comisión de Prezos e Valores vamos diferenciar entre consumo doméstico e industrial. Todos aqueles abonados que sexan domésticos van pagar menos da subida do IPC, xa que o incremento definitivo será dun 1,45 por cento. Isto vai en detrimento dos usos industriais, que terán que pagar un pouquiño máis que a suba do IPC polo consumo da súa auga”.

A rexedora municipal tamén adiantou que “outra das taxas que se actualizará é a do Punto de Atención á Infancia, que ía pendente de revisar dentro do plan de axuste que solicitou o Concello o ano pasado, porque os ingresos que temos son bastante inferiores que o gasto ocasionado polo propio Punto de Atención á Infancia. A idea que tiñamos era subir unha cantidade simbólica que fora máis ou menos uns 2.000 euros de recadación a maiores a finais do ano 2013. O que decidimos foi incrementar nun 6,82 por cento o prezo da hora. Hai que ter en conta que no Punto de Atención á Infancia non se modificaban as taxas dende o 2008, polo que si calculáramos a suba do IPC dende ese ano sería dun 6,7 por cento e neste caso xustificamos este incremento en base ao plan de axuste que ten que cumprir o Concello de Lourenzá”.

Sobre o Punto de Atención á Infancia, Emma Álvarez tamén aclarou que “hai bonificacións en función do número de horas que teñen os usuarios e o que varían son cantidades tan pequeniñas, como por exemplo nunha bonificación de 8 horas diarias son cinco céntimos á hora máis. Nos casos de horas puntuais é onde se nota máis, é o 6,82 por cento, o que supón 0,30 euros a maiores cada hora. Pero non nos queda máis remedio que facelo, posto que se non actualizamos as taxas este ano quedaría aí acumulado e cando se tiveran que revisar, pasados uns anos, esta subida sería de golpe e o goberno local considera que é moito máis axeitado tanto para o Concello como para os usuarios que estas actualizacións vaian sendo paulatinas”.

Delegacións municipais

Ademais no pleno da corporación municipal do vindeiro luns darase conta das resolucións da Alcaldía a raíz da renuncia do segundo tenente de alcalde, Vidal Martínez-Sierra, con motivo do seu nomeamento como deputado autonómico, razón pola que “presentou a súa renuncia como segundo tenente de alcalde e tamén deixou as delegacións que levaba dentro do organigrama municipal para dedicarlle máis tempo á política autonómica”, explicou Álvarez Chao, quen tamén deu a coñecer que “a partir de agora o segundo tenente de alcalde volve ser Pablo Maseda, o actual concelleiro de Deportes. En canto ás delegacións que tiña Vidal Martínez-Sierra quedan distribuídas do seguinte xeito: da de Medio Ambiente farase cargo Antonio Reigosa, que levará tamén Medio Rural e Comercio e a de Sanidade asúmoa eu mesma, tal e como tiña antes de ser alcaldesa”.

Emma Álvarez rematou explicando que “tamén imos declarar neste pleno a non dispoñibilidade dos créditos procedentes das cantidades derivadas da supresión das pagas extraordinarias do mes de decembro de 2012. Xa o anterior alcalde, Vidal Martínez-Sierra, no pleno do 17 de agosto renunciara á paga extraordinaria de decembro, así como o primeiro tenente de alcalde, Dino Vidal, e eu mesma tamén renunciei á extra en solidariedade cos traballadores no primeiro pleno unha vez que fun nomeada alcaldesa”.

———————

ORDE DO DÍA. PLENO, LUNS 19 DE NOVEMBRO
1º.- LECTURA E APROBACIÓN, SE PROCEDE, DO BORRADORES DAS ACTAS DA SESIÓNS
ANTERIORES DE DATA 21/09/2012 E 25/10/2012.
2º.- CORRESPONDENCIA OFICIAL.
3º.- DACIÓN DE CONTA DAS RESOLUCIÓNS DA ALCALDÍA DENDE O DÍA 28/09/2012.
4º.- DACIÓN DE CONTA DAS RESOLUCIÓNS DA ALCALDÍA REFERENTES AO NOMEAMENTO
DO SEGUNDO TENENTE DE ALCALDE, Á DELEGACIÓN DE ÁREAS ESPECÍFICAS DE
ACTUACIÓN MUNICIPAL E Á DELEGACIÓN DE ATRIBUCIÓNS DA ALCADÍA NA XUNTA DE
GOBERNO LOCAL, COMO ORGANO COLEXIADO.
5º.- DACIÓN DE CONTA DOS INFORMES DAS FACTURAS DO 3º TRIMESTRE DO EXERCICIO DO
2012 ACERCA DO CUMPRIMENTO DOS PRAZOS PREVISTOS PARA O PAGO DAS OBRIGAS DA
ENTIDADE DE CONFORMIDADE CO DISPOSTO NA LEI 15/2010 DE 5 DE XULLO, DE
MODIFICACIÓN DA LEI 3/2004 DE 29 DE DECEMBRO, DE LOITA CONTRA A MOROSIDADE NAS
OPERACIÓNS COMERCIAIS.
6º.-DECLARACIÓN DE NON DISPONIBILIDADE DOS CRÉDITOS PROCEDENTES DAS
CANTIDADES DERIVADAS DA SUPRESIÓN DAS PAGAS EXTRADORDINARIAS DO MES DE
DECEMBRO 2012 DE CONFORMIDADE CO DISPOSTO NO ARTIGO 33 DO REAL DECRETO
500/1990 DE 20 DE ABRIL
7º.- EXAME DAS ALEGACIÓNS PRESENTADAS Á APROBACIÓN INICIAL DA MODIFICACIÓN
DA ORDENANZA MUNICIPAL REGULADORA DO USO E APROVEITAMENTO DE VÍAS
PÚBLICAS E PISTAS FORESTAIS NO CONCELLO DE LOURENZA E ADOPCIÓN DOS ACORDOS
QUE PROCEDAN.
8º.-EXAME E APROBACIÓN, SE PROCEDE, DOS EXPEDIENTES DE MODIFICACION DAS
ORDENANZAS FISCAIS PARA O ANO 2013.
9º.-ESCRITO DO CEIP “JUAN REY” SOLICITANDO O NOMEAMENTO DO REPRESENTANTE DO
CONCELLO NO CONSELLO ESCOLAR DE DITO CENTRO.
10º.- ESCRITO DE Dª. JOSEFA RIVAS GEADA E DON ANTONIO RIVAS RON SOLICITANDO
PERMUTA DE TERREO EN BODEGAS (SAN XURXO) E INCIO, SE PROCEDE, DO EXPEDIENTE
DE DESAFECTACIÓN CORRESPONDIENTE.
11º.- MOCIÓN DO B.N.G. REFERENTE AO INCREMENTO DA OFERTA FORMATIVA EN MODO
CURSOS NO CONCELLO DE LOURENZÁ.
12º.- ROGOS E PREGUNTAS.