Os socialistas sinalan que o PP pon en risco aos mariñeiros galegos ao negarse a derrogar o decreto que establece os prezos dos servizos de rescate

O portavoz de Pesca do Grupo Socialista, José Ramón Val, acusou hoxe ao PP de poñer en risco aos mariñeiros galegos ao negarse a derrogar o decreto 130/2012 que establece os prezos polos rescates da Consellería do Mar. Val presentou unha Proposición non de Lei na Comisión de Pesca para derrogar este decreto, restaurar o seguro colectivo de accidentes no mar e o seguro de mal tempo.

Val criticou que a Xunta está a provocar a “perda de dereitos e a degradación das condicións de vida e de traballo” dos traballadores do mar tanto coa aprobación deste Decreto como pola supresión do seguro colectivo de accidentes no mar e o seguro de mal tempo. Acusounos de “aforrar naquilo que ten que ver coa seguridade e a cobertura laboral das persoas”.

O parlamentario socialista advertiu que este decreto establece por exemplo o cobro polo salvamento a percebeiros, xa que establece o cobro polo rescate “en zonas de difícil acceso, rompentes, acantilados ou semellantes”. Sinala que a realidade é que este decreto fai que “o sector o pense dúas veces antes de chamar aos equipos de salvamento”, cos conseguintes riscos que iso supón.

Criticou así a xestión dos medios de salvamento marítimo por parte da Consellería do Mar, que ven de privatizar o servizo de rescate aéreo amparando o incumprimento do contrato por parte da concesionaria “dándolle potestade para deixar de facer as gardas presenciais e facelas localizadas”.

Isto provoca o incremento dos tempos de resposta con consecuencias fatais, como sucedeu no falecemento dun mariñeiro na Mariña Luguesa no pasado mes de novembro e o dunha percebeira en Oia no mes de decembro.

Ademais, dixo, o goberno galego “abandona ao sector tamén en materia de prevención unha vez desaparecido o seguro de mal tempo”, co que “a única política preventiva son as declaracións de Feijóo chamando á prudencia das xentes do mar”.

Seguro colectivo

José Ramón Val solicitou hoxe tamén a recuperación do seguro colectivo de accidentes no mar, que beneficiaba a 30.000 traballadores e traballadoras, compatible co seguro de responsabilidade civil e que foi eliminado por Feijóo.

Sinalou que cun custe de un millón de euros, un 0,16 por cento do orzamento da Consellería que menos executa as súas contas, “cubría ás mariscadoras, aos mariñeiros de flota artesanal e de altura e aos mariñeiros que traballaban en buques con bandeira de terceiros países” e que foi suprimido “por axuste económico”.