O PSdeG de Lugo reclama diálogo á Xunta se quere cambiar a rede de centros provincial e que abandone o “decretazo”

Concepción Burgo e Carlos Ferreiro anunciaron iniciativas do PSdeG no Parlamento para que a Xunta explique se o que quere é modificar a actual Rede de Centros Educativos e, se é así, esíxelle que deixe de facelo “pola porta de atrás” e poña o plan “sobre a mesa” para poder estudalo

Os socialistas lembran que o PSdeG estuda levar aos tribunais o repago nos comedores e piden que “se a Xunta insiste en levalo xa a cabo por decreto, como mínimo teñan en conta a situación actual das familias, que puido ter mudado coa crise” e non o fagan en base á declaración da renda de 2011

A deputada autonómica Concepción Burgo e o secretario de Educación provincial, Carlos Ferreiro, anunciaron esta mañá medidas contra “o desmantelamento do ensino público” en Galicia e na provincia de Lugo. Desde o PSdeG lucense reclamaranlle á Xunta a través de iniciativas no Parlamento que defenderá o deputado monfortino Vicente Docasar, voceiro de Educación, que explique se o que pretende realmente é modificar a actual Rede de Centros Educativos, que data de 1990. Se é así, pídenlle que deixe da facelo “pola porta de atrás” a través do continuo “decretazo”, e solicitan “que poña o plan enriba da mesa e haxa diálogo con transparencia”. Ademais, tamén anunciaron iniciativas contra o actual modelo da proposta de repago nos comedores escolares.

Concepción Burgo, que vén de rexistrar ademais varias iniciativas para deter a eliminación de ESO e Bacharelato no IES As Mercedes de Lugo, pide que o Goberno galego explique “se están intentando reformar a Rede de Centros a golpe de decretazo” e “confundindo a maioría absoluta cunha maioría absolutista”. A socialista critica que “non se sabe nada sobre os criterios que levan a escoller a determinados centros”, e lembra que están afectados por esa incertidume institutos de Chantada, Vilalba, Monforte, Lugo e Sarria. Asimesmo, apuntou que Docasar xa presentou unha iniciativa no Parlamento en febreiro, antes de que a Xunta tomase as primeiras decisións, reclamando diálogo para a reforma dos centros, á que o Goberno galego fixo caso omiso.

Burgo preguntouse, asimesmo, “por que todas estas medidas de redución de oferta educativa, prazas e recortes nunca afectan aos centros concertados e ademais van contra os mellores centros do ensino público”, e quere saber “que intenta ocultar o Conselleiro” con estas decisións. “Estamos fartos de improvisacións e de obxectivos ocultos, queremos as cartas enriba da mesa”, afirmou a socialista.

Os xefes territorias da Xunta en Lugo, “comisarios políticos”

Pola súa banda, o secretario de Educación provincial, Carlos Ferreiro, lamentou que volva a producirse unha situación como a que sucedeu co Politécnico lucense, “de feitos consumados e desprezo pola comunidade educativa”. O socialista criticou ademais que “as declaracións que se fan desde as Xefaturas Territoriais do PP en Lugo nunca coinciden coas decisións que se toman desde Santiago”. Neste sentido, cualificou de “auténtico despilfarro” a estrutura organizativa do Goberno galego, xa que “os xefes territoriais teñen un papel baleiro de contido, máis de comisarios políticos do que deciden en Santiago coa calculadora na man que como garantes dos intereses dos veciños”. Ferreiro lembroulle ademais aos dirixentes do PP en Lugo que “a defensa do IES As Mercedes demóstrase votando a favor do centro nos órganos de decisión, e non cunha fotografía dunha visita nun medio de comunicación”.

Iniciativas contra o repago nos comedores

Carlos Ferreiro incidiu en que o PSdeG de Lugo está a presentar iniciativas en todos os concellos da provincia contra o repago nos comedores escolares, e Concepción Burgo anunciou que tamén levarán novas accións ao Parlamento. A socialista afirmou que “un aspecto que preocupa moito” é que “se a Xunta insiste en levar esta medida xa a cabo por decreto, como mínimo deben ter en conta a situación actual das familias, que puido ter mudado coa crise e o aumento do paro” e non o fagan en base á declaración da renda de 2011, unha petición que elevarán á Cámara autonómica. Burgo lembrou, con todo, que o PSdeG está a estudar a posibilidade de presentar un recurso ante o Tribunal Constitucional.

“Isto non é unha medida progresiva, como lle gusta dicir ao conselleiro Jesús Vázquez”, afirmou a deputada, que cre “unha tomadura de pelo que se refiran a isto como algo progresista e socialdemócrata”, xa que o estilo de Vázquez, di, “é impoñer medidas sen falar con ninguén” e “castigar da mesma maneira a unha familia monoparental que ingresa 8.000 euros que a unha que ingresa 60.000”. Na mesma liña, Ferreiro falou de “clasismo descarado” e invitou á Xunta a “votar a favor do imposto ás rendas altas e á banca se de verdade o que quere é que os que máis teñen, máis paguen”.

Incidencia “moi grave” no rural

A deputada Concepción Burgo destacou a “incidencia gravísima” que este repago nos comedores ten sobre as zonas rurais de Lugo, “aos que xa lles quitaron centros, aulas e mestres” e agora “vense obrigados ao repago porque non teñen centro escolar onde viven e non teñen outra posibilidade que comer na escola”.

Neste sentido, Carlos Ferreiro destacou que “o PP quere enganar coas cifras”, e lembrou que “moitas familias terán que afrontar pagos de preto de 100 euros mensuais, de cerca de 200 se teñen dous fillos”, polo que estas terán que pagar case 2.000 euros anuais “por algo que por lei ten que ser obrigatorio e gratuíto”, no que considera “ataque ao Estado de Benestar e aos servizos públicos”. Na provincia de Lugo, máis de 7.000 familias terán que pagar polo comedor escolar, e máis de 4.000 delas asumirán a cuota máxima.