O BNG de Lugo apoiou á CIG na defensa das clases traballadoras lucenses

O secretario xeral da CIG chamou a preparar novas mobilizacións, sen descartar folga xeral antes do verán, ante o anuncio do PP de novas reformas.

A CIG sae á rúa contra as últimas reformas que precarizan as condicións laborais da mocidade, dificultan as xubilacións anticipadas e o acceso ao subsidio a maiores de 55
A respecto das reformas que se van aprobar este venres, Xesús Seixo afirmou que “serán máis duras do que se prevían ao desfasarse as previsións que fixo o goberno sobre a caída do PIB.

Lugo, 24 de abril de 2013. Esta mañá, o BNG saíu á rúa apoiando o acto público e a manifestación que a CIG desenvolveu en Lugo, no que o secretario xeral da CIG, Suso Seixo, analizou as últimas reformas feitas polo goberno do PP no Estado e augurou a nova aprobación dun paquete de medidas no Consello de Ministros deste venres “que serán máis duras do que se prevían ao desfasarse as previsións que fixo o goberno de Rajoy sobre a caída do PIB, que situaban nun 0,5 %, mentres que o FMI e a Unión Europea situaron a caída nunha cifra que triplica esta previsión, no 1,6 %, polo que isto vai incidir no que son os ingresos do propio Estado e no déficit público. O único que podemos agardar deste venres é que anuncien novas medidas moito máis duras de recorte do gasto público, polo que vai afectar aos sectores que xa se viron atacados: ensino, sanidade… e posiblemente tamén de incremento de impostos, non só indirectos, senón tamén directos, porque nós tememos que se incrementen de novo as cotizacións do IRPF que prexudican principalmente á clase traballadora”.

O secretario xeral da CIG denunciou as últimas medidas aprobadas en Consello de Ministros. Nomeadamente o R.D. Lei 4/2013, do 22 de febreiro, polo que se aproba un plan de contratación a menores de 30 anos e modifícase a regulamentación das ETTs, entre outros, e o R.D. Lei 5/2013, do 15 de marzo, no que tamén se muda a regulamentación e requisitos para a xubilación parcial e anticipada; o fomento da xubilación en activo e recórtase o subsidio de desemprego para maiores de 55 anos. Para Seixo estas medidas non supoñen nada novidoso con respecto ao que veñen sendo as políticas do PP, “ recortar dereitos, proporcionar man de obra barata á patronal e sacar medidas especialmente duras cos sectores máis desfavorecidos e os que están a sufrir de forma máis directa as consecuencias da crise económica”, denunciou.
A este respecto subliñou a gravidade de aprobar unha nova regulamentación para os contratos a menores de 30 anos, subvencionados, que permiten salarios inferiores aos 500 euros e, nalgúns casos, mesmo sen dereito a prestación. Regulamentación que vén empeorar as xa precarias condicións contempladas nos contratos de formación e prácticas. Denunciou que se favoreza a contratación de xubilados/as mantendo o 50% da súa pensión, nunhas condicións moi beneficiosas para a empresa. Unha medida coa que se dificulta, dixo “a incorporación ao mercado laboral de traballadoras/es en paro e que é, na práctica, discriminatoria no sentido de que non todos os xubilados/as chegan a esa idade nas mesmas condicións físicas e económicas”.

Reformas o 26 de abril
Respecto do anuncio dun novo paquete de reformas a aprobar no Consello de Ministros do vindeiro venres 26 de abril, Seixo advertiu que o que se pretende, por exixencia da UE, é abaratar máis o despedimento; rebaixar os salarios; subir os impostos indirectos e non revalorizar as pensións en función da carestía da vida.

“Séguese a insistir nas políticas de sempre, que non serven para reactivar a economía e saír da crise. Políticas que pretenden que os custos da crise caian nas clases populares”, denunciou, “mentres a banca e as grandes empresas campan ás súas anchas, fan despedimentos masivos e seguen evadindo impostos a través dos paraísos fiscais”.
Ante esta situación proclamou que o goberno do PP “non nos representa” e que esta UE, “non nos interesa” e fixo un chamamento a seguir a mobilizarse, atentos/as ás medidas que se aproben o día 26 porque se son segundo o previsto “haberá que preparar novas mobilizacións, sen descartar a convocatoria dunha folga xeral antes do verán”.
Ademais, o secretario xeral da CIG fixo un convite a todos e todas as traballadoras a participar de xeito masivo nas manifestacións o 1 de maio, Día Internacional da Clase Obreira, e que “os traballadores e traballadoras deste país deamos contestación ás políticas neoliberais que están a minar os nosos dereitos”.